Analistja politike, Pranvera Ejupi, vlerëson se ish-presidentja Vjosa Osmani, mund të emërohet edhe një herë në krye të vendit.
Ajo thotë se do të ishte mirë që kryeministri në detyrë dhe kreu i VV-së, Albin Kurti, t’ia lironte pozitën e presidentes Vjosa Osmanit.
“Do të ishte mirë që Albin Kurti t’ia lirojë pozitën e presidentes Vjosa Osmanit. Gjithashtu do të ishte mirë edhe që LDK të përfshihej në Qeveri. Pas takimit të sotëm, u pa se Kurti ishte shumë i relaksuar. Kurti ka ndryshuar ngha vitet e mëparshme kur ka qenë pjesë e opozitës dhe më pas si kryeministër”, ka thënë Pranvera Ejupi në “Këndi i Debatit” në tëvë1.
Gjithsesi, Ejupi pohon se fillimisht do të tentohet që të gjendet një president jo-politik.
“Kurti mendoj se është i gatshëm të bëj kompromis. Në shtator pritet që të lirohet Hashim Thaçi dhe do të ndryshojë situata edhe nëse nuk futet në politikë. Nëse nuk arrihet ndonjë kompromis për ndonjë president jo-politik, besoj fuqishëm se Kurti do t’ia lirojë pozitën e presidentit LDK-së”, shtoi Ejupi.
Kujtojmë se Vjosa Osmani ka qenë e pranishme sot në takimin që u zhvillua mes Kurtit dhe kryetarit të LDK-së, Lumir Abdixhiku.
“Nuk ka qenë e nevojshme që Vjosa Osmani të shkonte në takim. Më mirë do të ishte që të shkonte Lutfi Haziri, i cili është i krahut tjetër të LDK-së që tashmë është krijuar”, ka deklaruar ndër të tjera, Pranvera Ejupi.
