Sonte katër klube shqiptare zbresin në fushë për sfidat e para të turit të tretë në garat evropiane.
Kampionët e Shqipërisë, Egnatia, do të përballen në transfertë me Olimpija Ljubljana në orën 20:00, në Slloveni.
Sfida pritet të jetë e vështirë për ekipin e Edlir Tetovës, pasi Olimpija, ndonëse së fundmi ndryshoi trajner, mbetet një skuadër me cilësi dhe eksperiencë.
Egnatia e kaloi me sukses Dinamon e Minskut në turin e kaluar dhe do të synojë të shkruajë histori duke u afruar më shumë drejt fazës play-off të UEFA Conference League.
Në të njëjtën natë, në orën 21:00, Dinamo e Tiranës do të përballet në Split me Hajdukun vendas, një emër i madh i futbollit kroat dhe evropian.
Pavarësisht se skuadra e Ilir Dajës nuk është favorite në letër, ajo do të kërkojë të bëjë maksimumin në një transfertë tejet të vështirë.
Kujtojmë se tekniku Daja ka përvojë të madhe evropiane, ku për katër sezone, u fut në grupe të Ligës së Konferencës dy herë me Ballkanin dhe dy herë me Skënderbeun.
