Kryeministri i Shqipërisë, Edi Rama, nuk e ka përmendur fare dënimin ndaj ish-krerëve të UCK-së në fjalën e tij në Asamblenë e Përgjithshme të OKB-së.
Fjala e Ramës në Asamblenë e Përgjithshme të OKB-së u përqendrua tek inteligjenca artificiale, ku e përmendi edhe ‘’ministren Diella’’, por jo edhe dënimin ndaj krerëve të UÇK-së.
Rama dënimin për Hashim Thaçin, Kadri Veselin, Jakup Krasniqin dhe Rexhep Selimin e pati quajti si ‘’Marre’’ të Gjykatës Speciale.
Ndërsa, në vitin 2022, ishte Rama ai që pikërisht në Asamblenë e Përgjithshme të OKB-së kishte folur për gjykimin e ish-presidentit Hashim Thaci por edhe për raportin e Dick Martyt mbi të cilin u krijua Specialja, raportin të cilin e pati quajtur si të “tmerrshëm”.
“Në bazë të atij raporti është krijuar Gjykata Speciale e Kosovës dhe ka arrestuar pa aktakuzë edhe presidenti i Kosovës Hashim Thaçi. Ai priti një vit në paraburgim derisa formalisht u ngrit aktakuza. Të gjithë ju, imagjinojeni për një moment, presidenti juaj ose kryeministri, udhëheqësit e vendeve tuaja, të merret në paraburgim në një vend të tretë për një vit të tërë pa asnjë aktakuzë zyrtarisht nga një trup i krijuar dhe i sponzorizuar nga një komunitet i vendeve demokratike”, pati thënë Rama.
Po ashtu pati thënë se “Nuk do të dorëzohemi nga e vërteta dhe do të nderojmë ata që dhanë jetën për liri dhe pavarësi”.
Ndërsa, në fjalën e tij në mbrëmjen gala të organizuar nga Këshilli për Marrëdhëniet Shqiptaro-Amerikane, foli për marrëdhëniet shqiptaro-amerikane dhe kujtoi edhe ish-presidentin e Kosovës, Hashim Thaçi.
Rama shprehu keqardhje për mungesën e Thaçit në këtë aktivitet.
“Po kështu më bën të vuaj mungesën e dikujt që ka qenë gjithmonë i ftuar edhe nën strehën e tij. Ai është Hashim Thaçi”, u shpreh Rama.
Rama tha se Thaçi nuk është sot pjesë e këtij takimi, duke e lidhur këtë me atë që e cilësoi si një tradhti ndaj tij.
“I kërkoj ndjesë gjithkujt që ndoshta do të ndihet i shpërfillur, por mund të them që gjëja më e mirë që mund të më ndodhte sot ishte të ulesha krah kumbarit shqiptar Sal Rusi. Po kështu më bën të vuaj mungesën e dikujt që ka qenë gjithmonë i ftuar edhe nën strehën e tij, ai është Hashim Thaçi. Ai nuk është sot pjesë këtu, sepse ky vend e tradhtoi, jo Biden-i e tradhtoi, sepse edhe gjenerali Clark bëri më të mirën. Ky vend nuk bëri më të mirën për Thaçin, për George Ëashingtonin e Kosovës”, tha Rama.
Më 16 shtator, Gjykata Speciale në shkallën e parë i ka dënuar krerët e UÇK-së me 81 vjet burgim: Hashim Thacin me 25 vjet, Jakup Krasniqin me 25 vjet, Kadri Veselin me 18 vjet dhe Rexhep Selimin me 13 vjet burgim.
