Më shumë se një ari tokë ku po ndërtohet një objekt banesor, pretendohet të jetë në pronë publike.
E për këtë, opozita në Viti fajtor po lë kryetarin Sokol Haliti.
Sipas Lëvizjes Vetëvendosje, në atë vend në mënyrë të jashtëligjshme Haliti ia kaloi vëllait të tij.
Nga VV thonë se ky vendim nuk është sjellë as në Kuvend Komunal për miratim.
“Fjala është për parcelën që ma herët ka qenë parcela në mes këtu, të cilën gjoja e ka shpronësuar dhe e ka vendosur përpara objektit, do të thotë e njëjta pronë është në shfrytëzim të vëllait të kryetarit të Sokol Halitit. Ne e kemi ndjekur këtë vendim që nga fillimi, që nga muaji i gjashtë i këtij viti dhe e kemi përcjellë çdo procedurë e cila ka rrjedh. Ligji për vetëqeverisje lokale dhe ligji për prona publike thotë decidivisht Kuvendi është organi i cili merret me ndryshimin dhe shqyrtimin e pronave publike. Çdo zonë apo çdo pronë publike duhet të dal dhe të votohet përmes Kuvendit, pra kjo lënë të kuptohet që është kontrabanduar si vendim sepse mezi kemi arritur të gjejmë. E kemi edhe vendimin që ë ka nënshkruar kryetari dhe drejtoresha e Kadastrit”, deklaroi Fatbardh Sallahu nga VV-ja.
Se ky projekt nuk ka kaluar në Kuvendin Komunal të Vitisë, e thotë edhe kryesuesi i saj nga Partia Demokratike e Kosovës, Bekim Azizi.
“Sipas informatave dhe dokumentacioneve që po na prezantojnë është për një pronë që ka qenë rrugë publike dhe gjithçka çka lidhet me pronat komunale, ligji tregon se duhet të kaloj së pari në Kuvendin Komunal të shpallet zonë me interes e pastaj të vazhdohet me procedurat tjera të shpronësimit apo këmbimit prona. Për këtë pjesë, për këtë parcelë, kjo procedurë nuk ka ardhur përmes Kuvendit Komunal”, deklaroi ai.
Për gjithë këtë situatë të krijuar, nga opozita thonë se kryetari e ka bërë për një qëllim.
“Mendoj që kryetari e ka kuptuar që zgjedhjet po i humb, kur e ka kuptuar që po i humb zgjedhjet e ka kapur edhe një pronë publike për vëllain e tij, sepse qytetarët e Vitisë e dinë sa është vlera e pronës aty do të thotë aty shkon deri në 100 mijë euro ari. Ne e kemi gjetur edhe një shkelje tjetër ligjore të cilën, Inspektorati jep urdhër që objekti të prishet sepse pas katër dite që është dhënë ky autorizim, kanë filluar punimet pa aplikuar për leje mjedisore dhe kushtet ndërtimore. Kanë filluar punimet se e kanë ditur që në aspektin ligjor nuk mundet me u ndërtua aty”, deklaroi Sallahu.
Nga VV thonë se për këtë çështje, të hënën do të dërgojnë padi në Prokurorinë Themelore në Gjilan ndaj kryetarit Sokol Haliti.
Nga ky i fundit, televizioni ka tentuar të marrë një përgjigje, por i njëjti nuk ka qenë i qasshëm.
