Policia e Kosovës ka arrestuar një person të dyshuar se ka kryer veprat penale “Keqpërdorimi dhe mashtrimi në Prokurimin publik” dhe “Falsifikim i dokumenteve”.
I njëjti dyshohet se ka fituar një tender në vlerë prej 150 mijë eurosh nga Komuna e Gjilanit, duke falsifikuar dhe dorëzuar një referencë të lëshuar më 2021.
“…I dyshuari me iniciale (A.K.) me rastin e ofertimit në tenderin ’’Furnizim me material për zyre’’ në Komunën e Gjilanit, kishte falsifikuar dhe dorëzuar referencën të lëshuar më herët në vitin 2021. Me këto referenca ai kishte implikuar Ministrinë e Forcës së sigurisë kinse kishte lëshuar ketë referencë për kompaninë e tij”.
“Me këto referenca i dyshuari kishte aplikuar në Komunën e Gjilanit në tenderin e lartshënuar duke fituar dhe firmosur kontratën me komunën e Gjilanit në vlerën njëqind e pesëdhjetë e pesë mijë euro (155,000€)”, thuhet në njoftimin e policisë.
Me vendim të prokurorit i njëjti është dërguar në mbajtje për 48 orë.
