Policia e Kosovës, në bashkëpunim me Prokurorinë Themelore në Prizren, ka zhvilluar një operacion në rajonin e Prizrenit lidhur me dyshimet për keqpërdorim dhe manipulim të votave në zgjedhjet e 28 dhjetorit.
Lajmi është konfirmuar për Tëvë1 nga Policia e Kosovës, e cila ka bërë të ditur se operacioni është në zhvillim dhe se për momentin nuk mund të ndahen detaje shtesë.
“Policia e Kosovës në bashkëpunim me Prokurorinë Themelore në Prizren, sot është duke zhvilluar një operacion në rajonin e Prizrenit lidhur me dyshimet për keqpërdorim të votave. Për detajet e këtij operacioni do të njoftoheni në përfundim të tij”.
Komuna e Prizrenit ka qenë një nga komunat ku janë shfaqur më së shumti dallimet tek votat e kandidatëve për deputetë, pas rinumërimit të votave.
Ndërkaq edhe nga Prokuroria Themelore në Prizren për Tëvë1 e kanë konfirmuar se është duke u zhvilluar një aksion.
Lajmin për këtë aksion e ka konfirmuar për Tëvë1 zëdhënësja e Prokurorisë Themelore të Prizrenit, Fitore Mehmeti. Por, ajo s’dha shumë detaje, ndërsa paralajmëroi komunikatë më vonë për të gjithë aksionin e sotëm.
“Mund të konfirmoj se është duke u zhvilluar aksioni dhe ka të bëjë me manipulim votash. Për momentin nuk mund të jap më shumë detaje, por gjatë ditës do të dalim me njoftim”, tha shkurt ajo.
