31 persona me simptoma helmimi ju drejtuan Klinikës Infektive.
Simptomat si të vjella, diarre, temperatura e lartë, dhe dhimbje të forta barku shtyu qytetarët që të kërkojnë ndihmë mjekësore.
E që nga e hëna e deri më sot në Klinikën e Infektives janë duke u trajtuar pesë persona nga Hani i Elezit.
“Gjatë datave 13, 14 dhe 15 korrik 2026, ndihmë mjekësore urgjente në këtë klinikë kanë kërkuar rreth 30 persona. Pas analizave të hollësishme laboratorike, 11 raste kanë rezultuar pozitive me bakterin Salmonella Enteritidis. Në kuadër të këtyre rasteve, gjatë kësaj periudhe treditore janë pranuar edhe pesë pacientë nga komuna e Hanit të Elezit me simptoma të ngjashme. Sipas deklaratave të vetë pacientëve, numri i personave që kanë konsumuar ushqim në të njëjtin lokacion dhe që dyshohet se mund të jenë helmuar është më i madh”, ka njoftuar QKUK-ja.
Kurse që nga e hëna e deri më sot në Qendrën Kryesore të Mjekësisë Familjare në Han të Elezit pranuan trajtim mjekësorë mbi100 persona me simptoma të tilla.
“Rastet e para të dyshimta kanë filluar që nga data 12 korrik nga ora 16:00 ku fluksi më i madh i pacientëve ka qenë rreth orës 20:00 deri në ora 04:00. Janë dyshimet e para sepse pacientët janë deklaruar që nga ushqimi, mirëpo ne si institucion kemi marr masat e nevojshme e kemi njoftuar IKSHPK- në ku bashkë me Inspektoratin kemi pasur inspektime në teren ku kanë marr mostrat në dy qendra që dyshohet të jetë bërë helmimi. Por jo vetëm nga helmimi kemi pasur raste kur pacientët kanë ardhur vetë nga shtëpitë e tyre, jo nga ushqimi por thjeshtë nga temperaturat e larta edhe çështja e virozëve”, ka thënë Kuka-Hasallari.
Për këto raste të dyshimta për helmimi nga ushqimi nga Policia treguan se dy pronarë të lokaleve do të intervistohen në Han të Elezit.
Nga QKUK kanë rekomanduar që të shmangen ushqimet e shpejta si dhe të kërkohet ndihmë mjekësorë menjëherë në raste se pas konsumimit të ushqimit shfaqen simptomat e lartcekura.
Ndryshe kujtojmë se një rast i tillë i helmimit ditë më parë u paraqit edhe nga ushqimi i konsumuar në një nga fast food-it në Prishtinë.
