Sot, do të zhvillohet dy ndeshjet e para në kuadër të gjysmëfinales të Kupës së Kosovës në basketboll, fazë kjo në të cilën skuadrat finaliste përcaktohen pas dy përballjeve.
Në Prizren dhe Mitrovicë, prej orës 18:45 do të përballen Bashkimi – Sigal Prishtina dhe Trepça – Bora, ndeshje këto që pritet të jenë interesante dhe të forta, me skuadrat që synojnë të bëjnë hapin e parë drejt finales së madhe.
Bashkimi do të ketë përkrahjen e madhe të tifozëve në palestrën “Sezai Surroi” dhe vlerësohet favorit përballë Sigal Prishtinës, ekip që e mposhti vikendin e shkuar në kuadër të Superligës së Kosovës.
Bashkimi triumfoi ndaj Prishtinës në kryeqytet me shifrat 84:63 dhe në ndeshjen e parë gjysmëfinale të Kupës së Kosovës, synon fitore për të krijuar avantazhin përpara duelit të kthimit.
Edhe Trepça llogaritet favorit ndaj Borës në palestrën “Minatori” në Mitrovicë pasi synimi i këtij ekipi është ta mbrojë trofeun e fituar sezonin e shkuar.
Trepça ka treguar një formë fantastike në Superligë, ku në dhjetë ndeshjet e fundit nuk di për humbje dhe kërkon që në duelin e parë ndaj Borës të krijojë avantazhin për të prekur finalen.
Në fakt, Bora dhe Trepça do të luajnë kundër njëra tjetrës edhe në vikend, por në kuadër të Superligës së Kosovës dhe atë në Prishtinë.
