Liga e Kampionëve rikthehet me xhiron e katërt të stinorit të rregullt, ku të martën spikatin tri prej nëntë dueleve sa janë në program.
Të gjitha këto katër ndeshje startojnë prej orës 21:00, ndërsa vëmendje më të madhe pritet të ketë përballja në stadiumin “Santiago Bernabeu” ndërmjet Real Madridit dhe Milanit.
Të dyja skuadrat nuk kanë treguar formë të mirë këtë sezon në Champions, pasi Reali është i 12-ti në tabelë me 6 pikë, tri më shumë se Milani që renditet i 25-ti pas tri ndeshjeve të luajtura deri më tani.
Duel tjetër interesant është edhe ai që luhet në Torino, ku skuadra e Juventusit e pret Lillen e Edon Zhegrovës.
Si Juventusi ashtu edhe Lille kanë nga 6 pikë të mbledhura, ndërsa Zhegrova pritet të jetë startues tek ekipi francez dhe kërcënimi kryesor për italianët.
Në Angli, saktësisht në stadiumin “Anfield Road”, lideri aktual i Premier Leagues, Liverpooli përballet me kampionin e Gjermanisë, Bayer Leverkusenin, pjesë e të cilit është Granit Xhaka.
Liverpooli ka 9 pikë dhe i prinë tabelës së bashku me Aston Villan, ndërsa Leverkuseni ka dy pikë më pak dhe sikurse kundërshtari i tij, ende nuk di humbje në Ligën e Kampionëve.
Prej orës 21:00, luhen edhe ndeshjet Sporting – Manchester City, Celtic – Leipzig, Borussia Dortmund – Sturm Graz e Bologna – Monaco.
Ndërkohë, prej orës 18:45 fillojnë duelet Sllovan Bratisllava – Dinamo Zagreb dhe PSV Eindhoven – Girona.
