Blerim Krasniqi do t’i prijë sulmit të skuadrës së Dritës në ndeshjen e kthimit kundër Breidablikut në kuadër të rrethit të dytë kualifikues të Ligës së Konferencës.
Trajneri i Dritës, Zekirija Ramadani ka publikuar formacionin për duelin me Bredablikun, i cili nis në orën 17:00 dhe luhet në stadiumin “Zahir Pajaziti” në Podujevë.
Drita ka avantazhin prej ndeshjes së parë, të cilën e fitoi javën e shkuar 1:0 në udhëtim.
Ramadani ka vendosur të paraqitet me sistemin e lojës 4-2-3-1, ku sulmues i vetëm është Krasniqi.
Krasniqi do të përkrahet nga prapa prej treshes Almir Ajzeraj, Kastriot Selmani e Veton Tusha.
Si mesfushorë defensiv, do të luajnë Albert Dabiqaj e Ilir Mustafa kurse vija e mbrojtjes përbëhet nga Egzon Bejtullai, Rron Broja, Juan Camilo Mesa e Raddy Ovouka.
Në portë është Faton Mustafa, i cili pati paraqitje të mirë në ndeshjen e parë.
Dritës në ndeshjen e kthimit i mungon mbrojtësi i krahut të djathtë, Besnik Krasniqi për shkak të suspendimit. Krasniqi në ndeshjen e parë u ndëshkua me karton të verdhë.
Ndërkohë, sulmuesi Arb Manaj është rezervist edhe pse në Islandë ishte titullar dhe shënoi gol.
