Analisti, Xhavit Drenori e sheh zbutje të Lëvizjes Vetëvendosje dhe të partive opozitare pranimin e ftesës së presidentes, Vjosa Osmani për takim konsultativ rreth çështjes së Kuvendit.
Drenori vlerëson kështu pasi sipas tij të gjitha subjektet tashmë mezi presin të gjejnë një rrugëdalje për të dalë nga ngërçi institucional.
Ai po ashtu vlerëson se në këtë takim partitë do të shkojnë me skenare sepse për Drenorin ato e dinë që presidentja nuk mund të ofroj zgjidhje.
“Unë besoj që është një zbutje e Vetëvendosjes dhe e subjekteve të tjera se edhe ata vetë mezi nuk po presin që me u gjet një rrugëdalje sepse kjo situatë e tillë nuk mund të vazhdojë shumë gjatë më se është edhe e tepërt. Unë po besoj që do të shkojnë me skenare se nuk do të shkojnë krejt kot pasi presidentja fundi I fundit nuk e ka fuqinë të ofroj zgjedhje, presidentja e ka obligim që t’i thërras në takim të konsultohet por nuk ofron zgjidhje. Nuk ka asnjë fuqi politike presidenti ose presidentja në këtë rast të thotë shiko nëse nuk e bëni ju këtë, ne e bëjmë këtë, nuk mundet. Prandaj në këtë rast është krejt në dorën e partive politike por vetë arsyeja pse ato nesër shkojnë atje unë po besoj që secila prej tyre shkon me një plan respektivisht shkojnë me plane”, ka thënë ai në emisionin “Info Nata” në Tëvë1.
Presidentja e Kosovës Vjosa Osmani, ka thirrur një takim konsultativ me partitë politike të enjten e 15 majit, për të diskutuar lidhur me çështjen e konstituimit të Kuvendit.
Takimi me partitë shumicë mbahet me fillim nga ora 13:00, ndërkaq takimi me partitë joshumicë mbahet me fillim nga ora 15:00./teve1.info/
