Skuadra e Drenicës po mobilizohet për sezonin e ri në Superligën e Kosovës, i cili nis pas dy javësh.
Përforcimi më i ri i Drenicës, është ai i sulmuesit Alban Shillova, i cili është prezantuar të enjten te skuadra nga Skënderaj.
Shillova do të jetë pjesë e Drenicës për sezonin 2026/27 dhe pritet ti prijë fazës së sulmit të kësaj skuadre.
“Alban Shillova është zyrtarisht pjesë e familjes kuqezi, duke iu bashkuar ekipit tonë me synimin për të dhënë kontributin e tij në arritjen e objektivave të klubit”, ka shkruar Drenica.
Shillova edhe në të shkuarën ka luajtur për Drenicën, ndërsa në Kosovë karrierë ka bërë edhe te shumë skuadra tjera, përfshirë Prishtinën e Llapin.
Krahas Shillovës, Drenica ka huazuar edhe mesfushorin Gjergji Kote nga Partizani i Tiranës.
Sezoni i ri në elitën e futbollit kosovar nis më datën 15 gusht, ndërsa Drenica në xhiron e parë do të luajë në shtëpi kundër Dukagjinit.
