Donjeta Sadiku është e vetmja përfaqësuese e boksit të Kosovës në Lojërat Olimpike “Parisi 2024”.
Për Sadikun, kjo është hera e dytë që paraqitet në ngjarjen më të madhe të sportit, ndërsa synimet i ka të mëdha. Në Olimpiadën e vitit 2020, Sadiku nuk pati ndonjë sukses por në Paris shkon më e përgatitur dhe me përvojë më të madhe.
Donjeta është në mesin e gjashtë sportistëve të kualifikuar me normë, ndërsa ka thënë se në Paris nuk do të kënaqet vetëm me pjesëmarrje pasi qëllimi i vetëm i saj është medalja olimpike.
“Kam punuar shumë për ta arritur normën olimpike. Unë prej fillimit, prej ciklit olimpik kur kam filluar stërvitjet kam thënë që në këtë cikël olimpik synimi im nuk është vetëm kualifikimi kështu që po shpresoj që të më prijë fati dhe të më realizohet ëndrra ime që e kam pasur gjatë gjithë karrierës sime. Normalisht që është medalja olimpike, medalja olimpike është fjalë e madhe mirëpo po shpresoj shumë që të kem fat dhe të arrij ta bëjë ëndrrën time realitet”, ka thënë Sadiku.
Po ashtu, edhe trajnerja e Sadikut, Mariola Sallauka ka besim të madh në boksieren e saj dhe shpreson që të kthehen me medalje nga Parisi.
Shorti për Donjeta Sadikun do të tërhiqet më 25 korrik, ndërsa meçin e parë do ta ketë tri ditë më vonë.
Krahas Donjeta Sadikut, me normë në këtë ngjarje janë kualifikuar edhe xhudistët Distria Krasniqi, Nora Gjakova, Laura Fazliu, Loriana Kuka e Akil Gjakova. Nora Gjakova që në Olimpiadën e shkuar fitoi medaljen e artë, do të jetë garuesja e vetme e ekipit aktual që do ta përfaqësoj Kosovën në tri edicione të Lojërave Olimpike. Gjakova mori pjesë edhe në “Rio 2016”, ndërsa të artën e fitoi në “Tokio 2020” dhe do të garoj në kategorinë deri 57 kilogramë.
Me ftesë në Lojërat Olimpike do të marrin pjesë edhe atletja Gresa Bakraqi, si dhe notarët Hana Beiqi e Adell Shaboviq. Notarja Beiqi do të thyejë një rekord të Kosovës në Olimpiadën e Parisit. Me 15 vjet, 10 muaj e 6 ditë, Beiqi do të bëhet garuesja më e re që përfaqëson Kosovën në Lojërat Olimpike. Beiqi do të paraqitet në disiplinën 50 metra stil i lirë, ndërsa do të garoj më 3 gusht.
Lojërat Olimpike “Parisi 2024” nisin të premten dhe përfundojnë më datën 11 gushtë. Xhudistët Nora dhe Akil Gjakova do të bartin flamurin e Kosovës në ceremoninë hapëse.
