Dogana e Kosovës ka njoftuar se në orët e hershme të mëngjesit, në pikën kufitare të Vërmicës, zyrtarët doganorë kanë zbuluar mjete monetare të padeklaruara gjatë një kontrolli të detajuar ndaj një automjeti të përzgjedhur për kontroll të dytë.
Sipas njoftimit zyrtar, gjatë kontrollit është gjetur një shumë e konsiderueshme parash në çantën e dorës së udhëtarit, të cilat nuk ishin deklaruar në hyrje të territorit të Kosovës, siç kërkohet nga legjislacioni doganor në fuqi.
Pas verifikimeve dhe konsultimeve me njësitë hetimore të doganës, mjetet monetare janë ndaluar për procedura të mëtejshme ligjore.
Në përputhje me rregulloret aktuale, ndaj udhëtarit është zbatuar masa e konfiskimit të 25% të shumës së përgjithshme të padeklaruar.
“Dogana e Kosovës rithekson rëndësinë e deklarimit të mjeteve monetare gjatë hyrjes apo daljes nga territori doganor dhe fton të gjithë qytetarët që të respektojnë ligjet në fuqi, për të shmangur masa ndëshkuese”, thuhet në njoftim./teve1.info/
