Mbi 1.5 miliard euro të hyra janë mbledhur nga Dogana e Kosovës gjatë vitit 2024.
Sipas njoftimit nga Dogana, kjo shifër përfaqëson një rritje të dukshme prej 10.5% krahasuar me të njëjtën periudhë të vitit të kaluar.
“Gjatë njëmbëdhjetë muajve të parë të vitit 2023, të hyrat e mbledhura ishin 1.36 miliardë euro, ndërsa këtë vit janë mbledhur 146.1 milionë euro më shumë. Ky trend pozitiv, që ka nisur të shfaqet vitin e kaluar, ka vazhduar të përforcohet në vitin 2024, duke konfirmuar përkushtimin e Doganës për të maksimizuar të hyrat”, thuhet në njoftim.
Po ashtu bëhet e ditur se përmirësimi i procedurave doganore ka kontribuar ndjeshëm në efikasitetin e procesit, lufta kundër kontrabandës ka ndihmuar në uljen e aktivitetve ilegale dhe rritjen e të hyrave, si dhe rritja e transparencës ka rritur ndërgjegjësimin dhe përputhshmërinë në përfitim të të gjithëve.
“Përmirësimi i Procedurave Doganore: Implementimi i teknologjive të avancuara dhe procedurave të thjeshtuara ka kontribuar ndjeshëm në efikasitetin e procesit, lufta kundër kontrabandës: Masa të intensifikuara në bashkëpunim me institucionet tjera kanë ndihmuar në uljen e aktiviteteve ilegale dhe rritjen e të hyrave, rritja e transparencës: Fushatat për të edukuar publikun dhe bizneset mbi përputhshmërinë ligjore kanë rritur ndërgjegjësimin dhe përputhshmërinë, duke sjellë përfitime për të gjithë”, theksohet në njoftim./teve1.info/
