Musli Gucati, djali i ish-kreut të OVL-UÇK-së, Hysni Gucatit ka thënë se Gjykata Speciale është duke vepruar në baza politike.
Musli Gucati në emisionin “Ditari” në Tëvë1, tha se kanë pasur shpresë që Hysni Gucati dhe Nasim Haradinaj do të lirohen, pasi sipas tij, ata janë arrestuar padrejtësisht.
“Kemi pasur shpresë që do të lirohen të pafajshëm, mirëpo ndodhi krejt e kundërt. Ajo çka arritëm me kuptu se edhe njëherë Gjykata dëshmoi se po vepron në baza politike dhe jo në baza juridike. Ne vetëm kemi pritur që të lirohen të pafajshëm dhe të hedhen poshtë të gjitha pikat e aktakuzave me të cilat ngarkohen edhe Hysniu dhe Nasimi, sepse padrejtësisht janë arrestuar. Kemi menduar që sado pak Gjykata ka reflektuar dhe kemi shpresuar që me vendimin e Apelit do të hedhen poshtë të gjitha akuzat. Prapë se prapë gjykata nuk po e vendos drejtësinë në vend”, ka deklaruar ai.
Ai thotë se sot kanë biseduar me babanë (Hysni Gucatin) dhe sipas tij, kanë shpresë që në Supreme do të vijë drejtësia për ta.
“Po kemi biseduar dhe mirë është, mesazhi i tij ka qenë që prapë se prapë pa marrë parasysh edhe pse ka qenë një vendim jo i favorshëm për ta, ata qëndrojnë të fortë. Janë optimist dhe shpresojnë në shkallën tjetër ku do ankohen avokatët, ekipet mbrojtëse në Supreme e kanë shpresë se në atë shkallë mund të vijë drejtësia për ta”, shtoi Musli Gucati.
Sipas tij, Gucati dhe Haradinaj kanë pritur që do të lirohen.
Gjykata e Apelit në Hagë ka ulur për tre muaj dënimin me burgimin të ish-krerëve të OVL UÇK-së, Hysni Gucati e Nasim Haradinaj. /Teve1.info/
