Në Ditën Ndërkombëtare të Punëtorëve, Asociacioni i Gazetarëve të Kosovës ka rikujtuar se të drejtat e punëtorëve duhet të vlejnë njësoj edhe për gazetarët dhe punonjësit e sektorit medial.
Sipas AGK-së, shumë gazetarë në Kosovë vazhdojnë të punojnë në kushte të pasigurta, me paga minimale, pa sigurime shëndetësore dhe pa kontrata të qëndrueshme pune.
Tutje, në reagim nënvizohet se gazetarët përballen me sfida të mëdha në terren dhe shpesh punojnë pa mbrojtje të mjaftueshme.
AGK-ja thekson se, për shkak të natyrës së profesionit, Ligji i Punës nuk zbatohet gjithmonë në mënyrë të barabartë për gazetarët.
“Ata punojnë orë të gjata, në ditë pushimi dhe në ditë festash, pa kompensim adekuat dhe pa respektim të të drejtave bazike të punës. Shkeljet e të drejtave të punës, përfshirë vonesat në paga, mungesën e pushimeve dhe pasigurinë profesionale, vazhdojnë të jenë të pranishme në sektorin medial”, thuhet në reagim.
Situata paraqitet edhe më shqetësuese për gratë gazetare, të cilat shpesh hasin në pengesa në realizimin e të drejtave të garantuara me ligj, përfshirë pushimin e lehonisë dhe të drejtën për gjidhënie.
“Në praktikë, këto të drejta nuk respektohen gjithmonë, duke i vendosur gratë përballë zgjedhjeve të padrejta mes profesionit dhe mirëqenies së tyre dhe të fëmijëve”, theksohet tutje në reagim.
Sipas AGK-së, mungesa e një sindikate gjithëpërfshirëse që do të përfaqësonte të gjithë punonjësit medialë e përkeqëson më tej situatën, duke i lënë gazetarët të ekspozuar ndaj abuzimeve dhe me mundësi të kufizuara për të kërkuar të drejtat e tyre.
Në këtë kontekst, AGK-ja u ka bërë thirrje institucioneve përgjegjëse, përfshirë Inspektoratin e Punës, që të rrisin mbikëqyrjen dhe të ndërmarrin masa konkrete për të adresuar shkeljet në sektorin medial.
Po ashtu, organizata u kërkon pronarëve të mediave të respektojnë legjislacionin në fuqi dhe të sigurojnë kushte dinjitoze pune për stafin.
Në fund, AGK-ja inkurajon gazetarët dhe punonjësit medialë që të jenë të informuar për të drejtat e tyre dhe të mos i pranojnë abuzimet, duke kërkuar mbrojtje kur këto të drejta shkelen.
“Gazetarët, kameramanët, fotografët janë punëtorë që kanë nevojë për siguri dhe dinjitet për ta kryer misionin e rëndësishëm për gazetari të lirë dhe të pavarur”, thuhet në fund të reagimi./teve1.info/
