E java nisi me takimin e kryeministrit Kurti me komandantin e KFOR-it, Ristuccia dhe shefin e EULEX-it, Wigemark.
Në një komunikatë të lëshuar nga Zyra e Kryeministrit, thuhet se konstatim i përbashkët ishte se nuk duhet të ketë barrikada në asnjë rrugë.
“U fol edhe lidhur me veprimet e strukturave kriminale në veri të Republikës së Kosovës, që cenojnë rëndë sigurinë në vend. Konstatim i përbashkët nga ky takim është se liria e lëvizjes duhet të rivendoset dhe se nuk duhet të ketë barrikada në asnjë rrugë”, thuhet në njoftimin e Qeverisë.
Ky takim, erdhi një ditë pasi pati të shtëna në afërsi të një patrulle të KFOR-it në Zubin Potok.
Sipas ekspertit të Marrëdhënieve Ndërkombëtare, Gurakuç Kuçit, ky ekces duhet të merret si pretekst që të largohen barrikadat.
“Institucionet e Kosovës duhet ta shfrytëzojnë në maksimum që në bashkëpunim me KFOR-in dhe vendet e QUINT-it, të rikthejnë forcat e veta në atë zonë që të largohen ato barrikada në emër të lirisë së lëvizjes dhe në emër të shtrirjes së sovranitetit dhe legjitimitetit të Kosovës”, tha ai.
Por sipas Kuçit, heqja e barrikadave me forcë nuk është kompetencë e KFOR-it.
“Institucionet e Kosovës është dashur që ta parashohin se KFOR-i nuk do të jetë ai institucion që do të marrë vendim për heqjen e barrikadave me forcë dhe këtë nuk do ta bëjë as tani. KFOR-i këtë mund ta bëjë vetëm duke i bërë presion që ne më nuk mund t’i ndalim institucionet e Kosovës që të veprojnë në atë zonë sepse KFOR-i do të shmangë pafundësisht konfliktet që mund të ndodhin”, shtoi Kuçi.
E për njohësin e çështjeve të sigurisë, Nuredin Ibishin, heqja e barrikadave duhet të ndodhë më së largu pas Vitit të Ri.
“Unë pres të ketë një zgjidhje politike apo diplomatike mandej të vjen deri te heqja e tyre. Nëse jo atëherë normal duhet ose të merr këtë valë KFOR-i që ka thënë edhe më herët që nuk do të lejojë vendosjen e barrikadave ose Policia e Kosovës me asistencë, me mekanizma që i ka parapa edhe Ministria e Punëve të Brendshme [4:59] Kjo duhet qoftë para apo menjëherë pas Vitit të Ri”, deklaroi ai.
Për heqjen e barrikadave, kryeministri Kurti kishte thënë se KFOR-i i kishte kërkuar kohë dhe se ato nuk mund të tolerohen shumë gjatë.
Kronika e gazetarit Gojart Jashari.
