Në Spitalin e Përgjithshëm të Ferizajt erdhi me ankesa për dhimbje barku.
E pas kësaj, pacientja femër F.M, iu drejtua tualetit.
E nga atje, mjekët dëgjuan të qarat e një foshnje.
Kjo i shtyri ata që të kërkojnë nga 19 vjeçarja ta hapte derën.
Pas pak minutash, FM e hapi derën, ndërsa ajo që e panë mjekët brenda tualetit i shokoi.
Sipas tyre, ajo nuk ishte lajmëruar si pacientë shtatzënë, ndërsa foshnjën pas lindjes e kishte hedhur në kosh të mbeturinave.
“Pas insistimit dhe presionit nga stafi mjekësor, të cilët kishin dëgjuar zërin e një foshnje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike”.
Kjo situatë, alarmoi mjekët në spitalin e Ferizajt.
Por, përkundër përpjekjeve, foshnja nuk arriti të mbijetonte.
“Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”.
E detaje shtesë se si ndërroi jetë foshnja, për Tëvë1, ka dhënë ushtruesja e detyrës së drejtoreshës në spitalin e Ferizajt.
“Janë ndërmarrë menjëherë procedurat e reanimimit, por foshnja nuk ka arritur të mbijetojë. Sipas neonatologes, foshnja kishte shenja të ngufatjes dhe dyshohet se pacientja i ka lëshuar ujë në banjo, duke e ftohur shumë foshnjën”, tha u.d, drejtoresha Minire Alijaj.
Pas gjithë kësaj, u njoftuan menjëherë edhe organet e rendit.
Gjatë gjithë ditës, këtu të enjten qëndruan hetuesit policor.
Ndërkohë gjendja e 19-vjecares, u vlerësua stabile.
Për këtë rast, tashmë edhe Prokuroria Themelore e Ferizajt ka nisur hetimet.
“Ju njoftojmë se me vendim të Prokurorit të Shtetit, trupi i pajetë i foshnjës është dërguar për obduksion në Institutin e Mjekësisë Ligjore në Prishtinë. Prokuroria është njoftuar për rastin dhe janë duke u ndërmarrë veprimet e nevojshme hetimore”, thuhet nga Prokuroria Themelore në Ferizaj.
Ndërkaq, rasti është hapur në drejtim të veprës penale “Vrasja e foshnjës gjate lindjes”.
