Shenjat nga gjuajtja me armë janë ende prezente.
Mbrëmjen e së shtunës, familja Osmani nga Vushtrria ishte cak i një sulmi me kallashnikov.
Nga kjo motoçikletë që u ndal para shtëpisë, dikush shtiu me armë zjarri.
Liridon Osmani beson se ai vet mund të ketë qenë caku, për shkak të problemeve të tij me një familje në Vushtrri.
“Sulmi ka ndodhur rreth orës 22:58 minuta e kam marr vesh prej prindit që më ka lajmëruar. E kam ditë që prej që më ka ndodh rasti herën e parë që e kam lajmërua, policinë edhe rastet që më kanë ndodh edhe që më ka ndodh sulmi më maska e kam ditë që prapë ka me më ndodhë, domethënë prej të njëjtëve akterë që më ka ndodh në fillim e besoj qind për qind që prej tyre është edhe sulmi që më ka ndodh këtu”, thotë ai për Tëvë1.
Sulmi i mbrëmshëm, ai tregon se lehtësisht mund të përfundonte me fatalitet.
“Nëna ka qenë në këmbë e për pak kjo pjesë e plumbit nuk e ka rrokë se nëna në këtë drejtim ka qenë në këmbë se dritat kanë qene ndezur e ata e kanë pa kush është krejt. Gjysmë orë më herët ne nuk kemi qenë në shtëpi ata i kanë përcjell lëvizjet tona krejt e kur jemi ardh në shtëpi kanë sulmuar, krejt janë kanë ata të njoftuar për të gjitha lëvizjet që i kemi bërë ne”, tregon Osmani për Tëvë1
Konflikti i tij me një familje në Vushtrri, e cila ka qenë e paqasshme gjatë ditës për televizionin, sipas Osmanit, nisi për shkak të një parcele të blerë vite më parë nga ai.
“Unë problem nuk kam me askënd, ata kanë me mu shkaku i një pronës që e kam blerë unë në qytet, unë pronën e kam ble në rregull me dokumente me krejt askujt borxh nuk i kam pas, por ata nuk po duan me ma lënë pronën tem, kjo është arsyeje”, thotë ai.
Vetëm disa javë më parë, Osmani tregon se u rrah brutalisht me shufra hekuri.
“Atë ditë kur më ka ndodh sulmi te kopshtit që e kam dërguar vajzën, ata domethënë janë kanë të njoftuar për çdo lëvizje që e kam bë se nuk kanë ditë qysh ndryshe me vepruar, e kanë ditë që unë jam i lirë veç me vajzë kur e dërgojë në kopsht. E aty në momentin që kam dashtë me hap derën e veturës me e shti në kopsht ata në atë moment më kanë sulmuar, domethënë janë kanë të njoftuar e krejt më kanë përcjell 100%”, ka treguar ai.
Prej kohësh, Osmani tregon se ka kërkuar mbrojtje nga Policia, mirëpo deri më tani atij nuk i është aprovuar kjo kërkesë.
Policia e Kosovës ka njoftuar se është duke u marrë me rastin, përderisa gjatë ditës, Prokuroria Themelore e Mitrovicës ka qenë e paqasshme.
