Deputetja e Lëvizjes Vetëvendosje, Labinotë Demi-Murtezi e ka quajtur paradoksale kërkesën e kryetarit të Nismës Socialdemokrate, Fatmir Limaj për të qenë kryeparlamentar pa qenë pjesë e qeverisë.
Demi- Murtezi në emisionin “Info Nata” në Tëvë1 është shprehur se bashkëpunimet bëhen gjithmonë në qeverisje të përbashkët.
“Për mua personalisht është pak paradoksale me kërku me qenë në qeveri pa qenë pjesë e qeverisë, me qeveris bashkë vendin pa qenë pjesë e qeverisë por vetëm me pozitën e kryeparlamentarit. Bashkëpunimet bëhen gjithmonë në qeverisje të përbashkët, në këtë kuptim në rrjedhën e deritanishme, në praktikat e deritashme të politikave në vendin tonë bashkëpunimi nënkupton bashkëpunim ose marrje të përgjegjësisë në qeverisje. Kuvendi kalon ligje, roli I kryeparlamentarit nuk është I vogël sidomos në raste të caktuara por qeverisjen dhe atë që e prek populli dhe me të cilën shquhesh në terren edhe në popull është qeveria dhe ministritë përkatëse”, ka thënë ajo.
Megjithatë ka shtuar se Limaj për të mbetet një figurë e respektuar edhe si kryetar i partisë së tij, edhe për kontributin e dhënë në luftë por edhe për bashkëpunimin që do ta dëshironin në të ardhmen.
