Profesori universitar, Bardhyl Dauti e ka vlerësuar si akt të një rëndësie simbolike zgjedhjen e Talat Xhaferit për kryeministër të Maqedonisë së Veriut.
Dauti ka thënë se zgjedhja e një shqiptari në krye të qeverisë teknike, shënon de-etnizimin e institucioneve kyçe të Republikës së Maqedonisë Veriore.
Ai në emisionin “Këndi i Debatit” në Tëvë 1, është shprehur se kompetencat e kryeministrit teknik kanë të bëjnë thjeshtë me mirëmenaxhimin e institucioneve.
“Një shqiptar në krye të qeverisë teknike në Maqedoni ka më shumë sensin e rëndësisë simbolike, sepse ka të bëjë me de-etnizim të institucioneve që dikuar kanë pasur monopol etnik Institucionet kyçe të Maqedonisë që ka të bëjë edhe me presidencën, kryeministrin apo kryeparlamentarin kanë qenë të rezervuara për një etni ndërsa tani kemi të bëjmë me de-etnizim të këtyre institucioneve përmes së zgjedhjes së ish-kryeparlamentarit në pozitën e kryeministrit. Një akt i tillë duhet të përshëndetet, duhet ta pranojmë faktin që qeveritë teknike në Maqedoni janë një praktikë e freskët, nuk kanë një histori shumë vjeçare. Kompetencat e kryeministrit teknik që ka rendësi politike kanë të bëjnë thjeshtë me mirëmenaxhimin e institucioneve, vetëmenaxhimin e të hyrave publike. Pra rëndësia do të shihet vetëm në sensin e simbolikës për de-etnizim të institucioneve kyçe të shtetit”, ka thënë ai. /teve1.info/
Kryeministri i Maqedonisë Veriore, Dimitar Kovaçevski, të enjten ka dorëzuar dorëheqjen. Nga posti i Kryetarit të Kuvendit dorëheqje ka dhënë edhe Talat Xhaferi.
Zgjedhjet parlamentare në Maqedoninë e Veriut do të mbahen më 8 maj 2024.
