Pas fitores në ndeshjen e parë kundër Zvicrës, Përfaqësuesja e Kosovës në basketboll e ka humbur duelin e dytë të parakualifikimeve për “Eurobasket 2025”. “Dardanët”, të mërkurën u mposhtën me rezultatin minimal në udhëtim te Danimarka në kuadër të Grupit H.
Dueli i luajtur në Naestved dhe që i takoi fazës së tretë parakualifikuese, përfundoi me shifrat 82:75 në favor të danezëve.
Kosova pati një paraqitje të mirë, sidomos në tre çerekët e fundit por nuk arriti ta mposht Danimarkën, e cila gjithashtu ka mposhtur Zvicrën në duelin e parë.
Me këtë fitore, Danimarka është lidere e grupit me katër pikë, një më shumë se Kosova që zë vendin e dytë, ndërsa ekipi që përfundon i pari, avancon në kualifikimet e rregullta për “Eurobasket 2023”. danezët startuan furishëm dhe ishin në epërsi 13:0 pas gjashtë minutave lojë, basketbollistët e Kosovës reaguan në çerekun e dytë për t’u rikthyer fuqishëm. Çereku i parë i takoi Danimarkës që e fitoi me shifrat 27:16, ndërsa të dytën e fitoi Kosova me rezultatin 27:17.
Danimarka i fitoi edhe dy periudhat e fundit. Çerekun e tretë e mbylli 25:22, ndërsa të fundit më rezultatin 11:10, që mjaftuan për ta mposhtur Kosovën. Amerikani i natyralizuar, Dominic Artis ishte më efikasi te Kosova. Ai ndeshjen e mbylli me 23 pikë të shënuara, prej të cilave realizoi pesë herë në shtatë tentimet për tri pikë.
Krahas 23 pikëve, Artis e mbylli ndeshjen edhe me 4 kërcime, 4 asistime e 3 topa të vjedhur. Me lojë të mirë te Kosova u dalluan edhe kapiteni Dardan Berisha me 13 pikë, Musab Mala me 11, ndërsa Drilon Hajrizi shtoi 10 pikë. Te Danimarka, katër basketbollistë e mbyllën ndeshjen me pikë dyshifrore.
Jonas Zohore pati 19 pikë, 8 kërcime e 4 asistime, ndërsa Gabriel Lundberg shtoi 20 pikë për këtë fitore të rëndësishme. Duelin e radhës në kuadër të parakualifikimeve për “Eurobasket 2025”, Kosova e luan të shtunën. Përballet në udhëtim me Zvicrën, të cilën e mposhti në Prizren me shifrat 76:49.
