Është kompania që i dërgon faturat e rrymës tek konsumatorët.
Por, të mërkurën, vet KEDS-it, i arriti një e tillë.
Kjo meqë për herë të pestë, kompania që e shpërndan energjinë elektrike në Kosovë, u gjobit nga Ministria e Tregtisë.
E gjitha kjo pas parregullsive me njehsorët elektrikë.
Për këtë, kësaj radhe KEDS duhet të paguaj edhe 40 mijë euro të tjera.
“Vlen të theksohet se po vazhdon procesi i verifikimit të njehsorëve elektrikë të konsumatorëve që kanë paraqitur ankesa. Vetëm gjatë dy ditëve të fundit, në laboratorin e Agjencisë së Metrologjisë janë verifikuar 19 njehsorë, prej të cilëve 7 kanë rezultuar pa afat të vlefshmërisë, ndërsa një njehsor është konstatuar pa lejim tipi. Raportet zyrtare të laboratorit janë proceduar në Inspektoratin Qendror të Mbikëqyrjes së Tregut për ndërmarrjen e masave ligjore dhe shqiptimin e gjobave ndaj KEDS-it, në vlerë prej 40,000 eurosh”, thuhet në njoftimin e MINTI-it.
E vet qytetarët kërkojnë që inspektime të tilla të njehsorëve të bëhen me shpesh.
“Te ne nuk kanë ardh ende, por shumë mirë që po shkojnë me i kontrollu se me të vërtete rryma për këtë standard që e kemi është shtrenjtë edhe duhet me i kontrollu këta njehsorë. Turqia çka është duke bërë po dihet po i keqpërdorë edhe rrymën që e kanë shitë edhe tash plus dallavere me ora. Për këtë send është dashur çdo shtëpi e banesë me i kontrollu”, u shpreh një qytetar.
“Unë jetoj vetë banesa diku afër 50 metra katrorë nuk kam shporetë, ngrohëse vetëm një e kam e deri tash më ka ardh 60 euro. Nuk rri askush nuk e shfrytëzojmë por është shumë shtrenjtë. Unë vitin e kaluar i kam bërë një kërkesë këtu, por këta nuk janë ardh me shiku tash pasi u bë kjo inshalla bëjnë diçka”, ka thënë një qytetar tjetër.
Por këta të fundit, KEDS thotë se do t’i kompensojë.
E gjitha kjo, nëse verifikohet se lëvizja e orës në njehsor e ka dëmtuar konsumatorin.
“Ritheksojmë se konsumi i energjisë elektrike matet me saktësi të plotë, çka është vërtetuar edhe nga Ministria e Industrisë, Ndërmarrësisë dhe Tregtisë, siç është bërë e ditur përmes njoftimeve. Pra, njehsorët elektrik bëjë matje të saktë të konsumit të energjisë elektrike. Devijimet e vërejtura në kohë janë një karakteristikë teknike e njohur e kohës së njehsorëve dhe përbëjnë problem teknik të cilin deri në një masë e parasheh edhe rregullorja. Çdo njehsor që ka tejkaluar këtë normë do të verifikohet, në qoftë se vërtetohet që lëvizja në orë e ka dëmtuar konsumatorin në fjalë, ndaj tij do të aplikohen korrigjimet sipas procedurave në fuqi”, thuhet në njoftimin e KEDS-it.
Se KEDS duhet t’i kompensojë qytetarët në rast se verifikohen defektet në njehsorët e tyre, e thonë edhe njohësit e ligjit.
“Në rast se bëhet një lloj ekspertimi nga ana e inspektorëve të MINT, në këtë situatë duhet që të njëjti të bëjnë një përllogaritje të përafërt të dëmit që ju ka shkaktuar qytetarëve. E përtej kësaj duhet të detyroj KEDS që të ju kompensoj atyre qytetarëve dëmin e shkaktuar si rezultat i vendosjes së gabuar të orës e cila e ka bërë llogaritjen e gabuar”, theksoj Bytyqi.
Ndryshe, MINTI-i ka bërë të ditur se procesi i verifikimit të njehsorëve elektrik është duke vazhduar.
