Instituti Kombëtar i Shëndetit Publik të Kosovës në një përgjigje për Teve1.info, ka thënë se nuk janë gjetur bakterie patogjene të cilat shkaktojnë helmimin në ushqim.
“Analizat mikrobiologjike, respektivisht rezultatet e koprokulturës kanë rezultuar pa baterie patogjene të cilat shkaktojnë helmim me ushqim. Në mostrën e sallatës është identifikuar numri i përgjithshëm i baktereve të gjalla mezofile 3200 cfu gr/ml”, thuhet në përgjigjen e IKSHPK-së.
Nga IKSHPK-ja kanë rekomanduar aplikimin e masave më rigoroze gjatë përgatitjes së ushqimit në mënyrë higjenike.
“Në bazë të rezultateve laboratorike rekomadojmë aplikimin e masave më rigoroze gjatë përgatitjes së ushqimit në mënyrë higjienike (duke përfshirë pastrimin adekuat të perimeve dhe përpunimin adekuat termik të ushqimeve). Të gjithë operatorët ekonomik duhet t`iu përshtaten standardeve të përpunimit dhe përgatitjes së ushqimit ku në përpikëri duhet të zbatojnë procedurat e HACCP si dhe përmbushja e standardeve bazike higjienike. Mbikëqyrja sanitare dhe pajisja me libreza sanitare për të gjithë punëtorët si dhe respektimi i instruksioneve nga inspektoratet. Marrja e të gjitha masave higjienike të cilat do të pengonin mekanizmin fekalo-oral të përhapjes së sëmundjes duke përfshirë DDD.”, kanë thënë nga IKSHPK-ja për Teve1.info.
Ndryshe, para një jave, pesë ushtarë të FSK-së kanë shfaqur simptoma helmimi, pas syfyrit që kanë ngrënë në kazermën “Nerë Born” në Gjilan. Të njëjtit kanë pasur simptoma si jashtëqitje dhe dhimbje barku.
