Më 10 mars, u panë bashkë në Mbledhjen e Kryesisë së Lidhjes Demokratike të Kosovës.
Me dyer të mbyllura për media, u diskutuan zgjedhjet në vend.
E pas një jave, pakënaqësitë brenda partisë u bënë edhe publike.
Deputeti nga ky subjekt politik, Avdullah Hoti kërkoi largimin e lidershipit aktual, pasi sipas tij rezultati i zgjedhjeve është i ulët.
“LDK-ja ka nevojë për një lidership me qasje ekipore, që është gjithëpërfshirës, me orientime të qarta politike të qendrës së djathtë, që mbledh rreth vetes profesionistë dhe e rikthen LDK-në në epiqendrën e profesionistëve më të mirë të Kosovës, siç ka qenë LDK-ja. LDK-ja ka nevojë për një lidership që punon me transparencë të plotë karshi strukturave partiake në të gjitha nivelet, që e kthen partinë në funksionimin statutar, që merr vendime kolegjiale në bazë të statutit të LDK-së (që është kushtetuta e partisë) dhe në konsultim të gjerë me strukturat qendrore dhe lokale të partisë. LDK-ja ka nevojë për një lidership ekipor që i fashit përçarjet, që tregon kujdes ndaj të gjithë aktivistëve të rinj e të vjetër, që i bën bashkë të gjitha copat e LDK-së në të katër anët e vendit dhe në diasporë. Një lidership i tillë është thelbësor për bashkimin, fuqizimin dhe kthimin e LDK-së në parimet e saj bazë, si parakusht për të rifituar besimin e qytetarëve për të udhëhequr me Kosovën”, ka shkruar Hoti.
Hoti renditi disa arsye që sipas tij e arsyeton largimin.
“Në katër vitet e fundit, lidershipi i partisë është angazhuar në ristrukturimin e partisë dhe degëve në gjithë Kosovën. Por, në jo pak raste, kjo është bërë në mënyrë selektive, jostatutore dhe pa konsideratën e nevojshme ndaj disa specifikave të brendshme të LDK-së. Këto specifika janë unike për LDK-në, e cila si parti 35-vjeçare i ka dhënë Kosovës dy presidentë, tre kryeministra, dhjetëra ministra e zëvendësministra, qindra deputetë e zyrtarë të lartë shtetërorë. Orientimi i lidershipit aktual për të bërë prerje të panatyrshme, si dhe distancimi nga e kaluara e lavdishme shtetformuese e LDK-së, pavarësisht sfidave e lëshimeve gjatë rrugëtimit të lidershipeve të kaluar, kanë zvetënuar besimin e elektoratit tradicional të LDK-së. Në vend të ndërtimit mbi ato arritje të LDK-së, lidershipi aktual ka krijuar distancë ndaj njerëzve dhe arritjeve të Kosovës gjatë qeverive të udhëhequra nga LDK-ja. Personalizimi i fushatës zgjedhore, përbërja e listës, renditja e kandidatëve në listë, paraqitja dhe favorizimi medial i një liste të ngushtë të kandidatëve të LDK-së, si dhe çështje të tjera para dhe gjatë fushatës, kanë dëmtuar kohezionin e brendshëm partiak, me gjithë përpjekjet e të gjithë neve për t’i tejkaluar ato pakënaqësi. Votimi disproporcional në diasporë e ka rënduar dhe cenuar më tutje atmosferën kolegiale dhe bashkëpunuese brenda LDK-së”, u shpreh ai.
Që kjo është diskutuar edhe në mbledhjen e kryesisë, e thotë kryetari i komunës së Pejës nga radhët e Ldk-së, Gazmend Muhaxheri.
Muhaxheri nuk i jep të drejtë kësaj kërkesë, pasi thotë se kryetari aktual, Lumir Abdixhiku e ka rritë partinë për 70%.
Tëvë1 ka provuar për një qëndrim rreth këtyre deklaratave edhe deputetë tjerë të këtij subjekti politik mirëpo nuk ka marrë përgjigje.
