Që në Kosovë të ketë ndriçim, në hapësirat e termocentraleve të Korporatës Energjetike punojnë qindra punëtorë.
Ata madje rrezikojnë edhe jetën që kjo Korporatë të jetë funksionale.
26 vite të jetës së tij, KEK-ut ia ka kushtuar Gëzim Slemani, i cili nuk është i kënaqur me kushtet e punës.
“Kur e shohim kërkesën në treg e shohim se shumë firma private, mjeshtër të ndryshëm e sene shkojnë deri 1500 euro pagë, a unë pagën bazë e kam prej 700- 800 euro. Ne kemi një limit të caktuar kur punojmë jashtë orarit në kushte ekstreme”, tha Selmani.
E kjo pagë po është e pamjaftueshme për këta punëtorë sidomos pas ngritjes së çmimeve të produkteve bazike.
“Unë jam familjar, me fëmijë e me grua, gjashtë anëtarë, plus nëna 7 anëtarë, ne po shohim inflacionin se ku ka shkuar plus ngritja e çmimit, prandaj kërkesa jonë kryesore është të na ofrohen kushte me të mira, një pagë bazë një pagë të dinjitetshme që të bëjmë një jetë të qetë”, tha ai.
Për shkak të rrezikut në punë, sipas kryetart të Sindikatës së re të KEK-ut, çdo vit në Kosovë vdesin afër 30 punëtorë.
“Paga e tyre është shumë e ulët krahasim me sfidat që i kanë natyra e punës është e tillë. Ne gjatë gjithë viti, i përcjellim rreth 30 punëtorë që vdesin gjatë vitit, pra 1% e stafit, e që në besojmë që është për shkak të rrezikshmërisë në punë”, tha Nexhat Llumnica nga Sindikata e re e KEK-ut.
Prandaj nga kjo Sindikatë kërkojnë që këtyre punëtorëve t’u plotësohen kushtet e punës.
“Ne kemi kërkuar që disa herë nga menaxhmenti i KEK-ut që të ngritë pagat, ne kemi parë që ditëve të fundit sektorit publik ju ka ngritë pagat kurse punëtorëve të KEK-ut që janë vetëfinancuar ani pse janë mundësitë nuk iu ngritet paga. Prandaj sfida kryesore mbetet paga, mospagesa e rrezikshmërisë, ani pse parashihet me ligjin për sigurinë në punë”, tha ai.
Punëtorët e KEK-ut kanë organizuar edhe protesta për plotësimin e kërkesave të tyre.
