Vizitat në Kosovë i ka të shpeshta.
Të madhe thotë që e ka edhe dashurinë për shtetin më të ri në Evropë, andaj eurodeputetja Viola Von Cramon e cilëson veten si shoqe të mirë të Kosovës.
Nga ky spektër Cramon, u shpreh hapur së dëshiron të shoh progres më të madh në dialogun mes Kosovës dhe Serbisë, para se të mbahen zgjedhjet në BE.
Megjithatë ajo nuk la pa kritikuar edhe Bashkimin Evropian për arsyen se nuk arriti t’i bindë palët ta nënshkruajnë marrëveshjen e Ohrit.
“Gjërat janë shumë dinamike, kemi parë pak progres. Pse unë jam pak në siklet sa i përket kësaj është se ne kemi zgjedhjet me 9 qershor të këtij viti dhe ju e keni parë disa rezultate që partitë e djathta janë duke u fuqizuar, e sidomos të djathtat ekstrem. Unë si shoqe e mirë e Kosovës, dëshiroj të shoh progres brenda këtyre muajve para se të shkojmë në kampanjat në zgjedhje. Pasi Brukseli do të mbyllet dhe të gjitha do të jenë të zënë sa i përket zgjedhjeve”, tha ajo në një konferencë për media të hënën në Prishtinë.
Tutje, Raportuesja për Kosovën në Parlamentin Evropian, Von Cramon, duke komentuar për sulmin ndaj policisë së Kosovës në Banjskë, tha se ka qenë një involvim serioz i grupeve të ndryshme të armatosura nga Serbia.
“Ka qenë një involvim serioz prej grupeve të ndryshme të armatosura nga Serbia dhe ka qenë e rëndësishme të kuptohet se si këto forca të armatosura do të reagojnë dhe si Bashkimi Evropian dhe Shtetet e Bashkuara të Amerikës do të reagojnë dhe a është rrezik i një lufte të shpejt. Fatmirësisht ne i kemi ushtarët e KFOR-it këtu dhe mendoj se është mirë që NATO-ja ka vendosur që të rris praninë e numrit të ushtarëve në Kosovë”, tha eurodeputetja.
E sa i përket masave ndëshkuese që Bashkimi Evropian i ka vendosur ndaj Kosovës, Cramon vlerëson se ato duhet të hiqen.
“Masat duhet të hiqen sepse kemi dëm kolateral dhe kryetarët e komunave të cilët dëshirojnë të aplikojnë për fonde të Bashkimit Evropian janë duke vuajtur për arsye të këtyre masave. Unë jam kundër dhe do të jem kundër dhe shpresoj që të largojmë këto masa sa më shpejt që të është e mundur. Jo të gjithë janë të lumtur me performancën, me të drejtë mendoj se duke krahasuar me shtetet tjera nuk është fare fer”, u shpreh Cramon.
Von Cramon mes tjerash foli edhe për lirinë e mediave dhe mos-transparencën nga institucionet, e gjithashtu përmendi edhe vrasjen e Liridona Ademajt gjatë vitit të kaluar, ku tha se shpreson që prokuroria shpejt ta përmbyll këtë rast dhe të ketë drejtësi për viktimën.
