Profesori Fatmir Çollaku, vlerëson se Ramush Haradinaj, është figurë e cila në këtë fazë në të cilën ndodhet Kosova, mund ta kryejë shumë mirë detyrën e Presidentit të Kosovës.
“Ramush Haradinaj është figurë që vjen nga lufta, është një figurë e cila ka përvojë në politikë pasi ka qenë edhe kryeministër i Kosovës. Jo vetëm Haradinaj, por ka edhe figura të tjera që mund ta kryejnë këtë detyrë”, ka thënë Fatmir Çollaku në emisionin “Infonata” në Tëve1.
Më 23 shtator, Gjykata Kushtetuese përveç që konstatoi se Kuvendi është konstituar dhe se formimi i Qeverisë “Kurti 4” nuk është antikushtetues, dha afat deri më 6 tetor për zgjedhjen e presidentit, duke konstatuar se afati ka filluar të rrjedhë më 8 gusht.
Zgjedhjet e 7 qershorit u shkaktuan pikërisht për shkak të dështimit të partive për t’u dakorduar për emrin e presidentit të ri.
Pas 7 qershorit, partia në pushtet Lëvizja Vetëvendosje kërkoi shtyrjen e seancës konstituive me arsyetimin se pa një marrëveshje për presidentin, konstituimi i Kuvendit dhe formimi i Qeverisë nuk shmangin zgjedhjet.
Kryetari i saj, Albin Kurti, dhe kryetari i Lidhjes Demokratike, Lumir Abdixhiku, pas disa takimesh njoftuan se janë dakorduar për emrin e Bekim Sejdiut për president. Por marrëveshja u kundërshtua nga gjashtë deputetë të LDK-së. Ndërkohë, PDK-ja pati qëndrim të prerë për qëndrim në opozitë dhe nuk diskutoi se VV-në për ndonjë emër.
