Manchester City është akuzuar nga Premierliga për shkelje të rregullave financiare më shumë se 100 herë në hapësirën e nëntë sezoneve.
Akuzat kundër kampionit në fuqi të Anglisë, kanë të bëjnë me informacionin financiar në lidhje me të ardhurat, detajet e shpërblimit të menaxherit dhe lojtarëve, rregulloret e UEFA-s, përfitimin dhe qëndrueshmërinë e bashkëpunimin me hetimet e Premierligës.
Një deklaratë nga liga tha se shkeljet e supozuara janë kryer nga shtatori i vitit 2009 deri në sezonin 2017-18 dhe tani do t’i referohen një komisioni të pavarur. Thuhet se klubi pretendohet se ka shkelur rregullat e ligës që kërkojnë “mirëbesim maksimal” të “informacionit të saktë financiar që jep një pamje të vërtetë dhe të drejtë të pozicionit financiar të klubit”.
Nëse City shpallet fajtor, atëherë përballet me një sërë sanksionesh të mundshme duke përfshirë një zbritje pikësh apo edhe përjashtim nga Premierliga.
