Nënkryetarja e PDK-së, Vlora Çitaku, e ka akuzuar kryeministrin Albin Kurti për sulm ndaj ish-presidentit Hashim Thaçi me të cilin siç ka thënë është e lidhur pashmangshëm Pavarësia e Kosovës.
Çitaku ka reaguar kështu pas deklaratës së Kurtit se skandali më i madh që e ka kuptuar kur e ka marrë postin e kryeministrit ka qenë zotimi i ish-presidentit Thaçi për mosdërgimin e Forcës së Sigurisë (FSK) në veri të Kosovës.
“Mbrëmë zgjodhe sërish të sulmosh Hashim Thaçin. Keqardhje për ty. Historia nuk rishkruhet as me fjalë, as me urrejtje. Ushtria e Kosovës e ka gjenezën në UÇK-në, TMK-në dhe FSK-në. Në të gjitha këto faza të transformimit, ti ke qenë një vrojtues destruktiv ose pasiv. Pavarësia e Kosovës është e lidhur pashmangshëm me Hashim Thaçin, me të gjitha sukseset dhe sfidat që e shoqëruan atë proces”, ka shkruar Çitaku në Facebook.
Më tej, ajo i ka kërkuar Kurtit të çlirohet nga mllefi dhe urrejtja pasi sipas saj populli nuk e ka zgjedhur për të ndarë fajtorë apo për të ushqyer urrejtje, por për të dhënë zgjidhje dhe për të ndërtuar të ardhmen’
“Por ti, Albin, çfarë ke bërë? Pse nuk shkrove historinë tënde? Pse nuk e bëre Kosovën anëtare të Këshillit të Evropës, të NATO-s, apo të organizatave të tjera ndërkombëtare që i sigurojnë vendit përparim dhe stabilitet? Sot, Kosova është në terr, pa rrymë, e izoluar dhe e përjashtuar. Populli nuk të zgjodhi për të ndarë fajtorë apo për të ushqyer urrejtje, por për të dhënë zgjidhje dhe për të ndërtuar të ardhmen. Çlirohu nga mllefi dhe urrejtja, Albin. Kjo të bën mirë – dhe do t’i bëjë mirë edhe Kosovë”, ka shtuar ajo.
