Nëse flini më pak se gjashtë orë në natë, kjo mund të ndikojë negativisht në shëndetin tuaj. Ekspertët kanë shpjeguar pse është e rëndësishme t’i kushtoni vëmendje kohëzgjatjes së gjumit.
Një sistem imunitar i dobësuar është vetëm një nga pasojat. Doktoresha Sue Peacock i tha Metro.co.uk :
“Ndërsa flini, sistemi juaj imunitar prodhon substanca mbrojtëse si citokinat që luftojnë infeksionin. Trupi i përdor këto substanca për të luftuar bakteret dhe viruset. Këto citokina gjithashtu ju ndihmojnë të flini, duke i dhënë sistemit tuaj imunitar më shumë energji për të mbrojtur trupin tuaj nga sëmundjet”.
Nëse nuk flini të paktën gjashtë orë, trupi juaj nuk do të prodhojë mjaftueshëm citokina, gjë që zvogëlon reagimin e trupit ndaj infeksionit. Pra, ndjeshmëria juaj ndaj sëmundjeve rritet dhe do t’ju duhet më shumë kohë për t’u rikuperuar.
Përveç sa më sipër, mungesa e gjumit do të rrisë ankthin dhe depresionin tuaj. Mund të ndikojë në hormonin tiroide, duke shkaktuar probleme tek gratë me menstruacione. Doktoresha Katharina Lederle tha:
“Mungesa e gjumit tek gratë e reja dhe të shëndetshme në fazën folikulare shoqërohet me një rritje të ndjeshme të niveleve të hormonit stimulues të tiroides (TSH). Nivelet e larta të TSH shkaktojnë çrregullime menstruale, anovulim (kur veza nuk lirohet), amenorre (mungesë të menstruacioneve) dhe aborte të përsëritura”.
Për më tepër, mungesa e gjumit shkakton shtim në peshë sepse ul nivelet e hormoneve si kortizoli, leptina dhe ghrelina në gjak. Këto hormone normalisht kontrollojnë peshën.
“Hulumtimet sugjerojnë se njerëzit janë në rrezik më të lartë për sëmundje kardiovaskulare si hipertensioni, goditja në tru dhe ataku në zemër.
“Ekziston gjithashtu një rrezik në rritje për diabetin dhe sëmundje të tjera kronike”, shtoi Peacock./telegrafi
