Ministri i Kulturës, Hajrulla Çeku bën të ditur se shtëpia e familjes Koroglu në Mitrovicë, që u përfshi mbrëmë nga zjarri, do të restaurohet, por që faturën e saj do ta paguajnë “ata që ia vunë flakën”.
Në një postim në Facebook, ai i ka quajtur barbarë ata që sipas tij, e djegin kulturën dhe historinë e tyre, përcjell teve1.info
“Pas një rezistence të madhe nga familja dhe një tentim rrënimi së fundmi, dje patën filluar ndërhyrjet për shpëtimin e shtëpisë së familjes Koroglu në Mitrovicë. Pasi e kuptuan që nuk zmbrapsemi nga detyrimi ynë për mbrojtjen e trashëgimisë kulturore, qyqarët në mënyrë tinëzare pasi ra terri ia vunë flakën shtëpisë së shekullit XIX. Nuk do t’ia dalin, shtëpia do të restaurohet. Dhe do t’i përdorim të gjitha mundësitë ligjore që faturën e restaurimit ta paguajnë ata që ia vunë flakën”, ka shkruar ai.
Tutje, ministri Çeku është shprehur se dënimet e deritanishme për dëmtim të monumenteve “janë vetëm inkurajim për keqbërësit”.
“Pres kapjen dhe ndëshkimin e kriminelëve. Prokuroritë dhe gjykatat tona kanë rol qendror në mbrojtjen e trashëgimisë kulturore. Dënimet e deritanishme me gjobë nga 200 deri 700 euro për dëmtim të monumenteve, kur kodi penal parasheh deri në 500 mijë euro e burgim efektiv, janë vetëm inkurajim për keqbërësit. Betejën mes barbarizmit dhe kulturës pa dyshim se do ta fitojë kultura”, ka theksuar ai.
Shtëpia më e vjetër në Mitrovicë, ajo e familjes Koroglu, që gjendet në listën e Trashëgimisë Kulturore për Mbrojtje të Përkohshme, është përfshirë mbrëmë nga zjarri, teksa e njëjta ishte dëmtuar edhe para disa muajsh. /Teve1.info/
