Ministri i Arsimit, Hajrulla Çeku ka bërë të ditur se në Ditën e Studentëve është përuruar ndërtesa e re e Fakultetit të Shkencave Matematike-Natyrore të Universitetit të Prishtinës.
Në ceremoninë e përurimit morën pjesë edhe kryeministri Albin Kurti dhe presidentja e Komisionit Evropian, Ursula von der Leyen.
Çeku ka thënë se studentët dhe stafi akademik tashmë kanë në dispozicion hapësira moderne për mësim, si dhe laboratorë të pajisur për kërkim shkencor.
“Me Strategjinë e re të Arsimit 2035+ synojmë që investimet në arsimin e lartë të lidhen më ngushtë me cilësinë e studimeve dhe zhvillimin e shkencës. Na duhen universitete që krijojnë dije dhe përmes kërkimit mbështesin industritë dhe prioritetet zhvillimore të shtetit”, ka shkruar Çeku.
Sipas tij, në qendër të këtij zhvillimi janë studentët dhe mundësia që ata të studiojnë, hulumtojnë dhe zhvillohen në kushte bashkëkohore.
Ministri ka theksuar se investimi është rezultat i partneritetit mes Bashkimit Evropian, Qeverisë së Kosovës dhe Universitetit të Prishtinës./teve1.info/
