Ministri në detyrë i Arsimit dhe Shkencës, Hajrulla Çeku, ka marrë pjesë në Simpoziumin Shkencor “Qëndrimet dhe vlerat në kurrikula dhe roli i tyre në edukimin e gjeneratave të reja”, të organizuar nga Instituti Pedagogjik i Kosovës.
Sipas Ministrisë së Arsimit, simpoziumi mblodhi studiues, profesorë universitarë, drejtues institucionesh arsimore, mësimdhënës dhe ekspertë të arsimit për të diskutuar mbi rëndësinë e vlerave dhe të kurrikulës në formësimin e gjeneratave të reja.
Në fjalën e tij, Çeku ka theksuar se arsimi është një fushë ku efektet e vendimeve shihen pas shumë vitesh, ndaj diskutimet për të kërkojnë durim, reflektim dhe vizion të qartë.
Ai ka veçuar dy çështje kryesore që, sipas tij, meritojnë vëmendje në modelin e shkollës 9-vjeçare: organizimin e ditës mësimore dhe kurrikulën.
Sipas Çekut, modeli i shkollës gjithëditore krijon mundësi që procesi mësimor të plotësohet me lexim, laboratorë, sport, art, projekte dhe forma të tjera të të nxënit praktik, duke përfshirë edhe bashkëpunëtorë të akredituar që sjellin përvojën e tyre profesionale dhe e lidhin më ngushtë shkollën me jetën.
Sa i përket kurrikulës, ai është shprehur se ajo duhet të jetë më e përqendruar në përmbajtjet thelbësore dhe lëndët të ndërtohen në mënyrë më të integruar.
Sipas tij, kjo do të mundësonte edhe zvogëlimin e numrit të teksteve shkollore, duke krijuar më shumë hapësirë për lexim, hulumtim, diskutim dhe punë praktike.
Çeku ka theksuar gjithashtu se zhvillimi i një sistemi arsimor cilësor kërkon bashkëpunim të ngushtë ndërmjet institucioneve, mësimdhënësve, studiuesve, prindërve dhe të gjithë akterëve të arsimit, ndërsa vlerësoi edhe rolin e Institutit Pedagogjik të Kosovës dhe Fakultetit të Edukimit në mbështetjen profesionale të mësimdhënësve.
Në kuadër të simpoziumit u prezantuan edhe punime shkencore që trajtuan rëndësinë e integrimit të vlerave në kurrikulën e arsimit parauniversitar, zhvillimin profesional të mësimdhënësve dhe reformimin e politikave arsimore me synim përmirësimin e cilësisë së arsimit në Kosovë./teve1.info/
