Ish-shefI i misionit diplomatik në Strasburg, Edon Cana ka thënë se çështja e pronave të Manastirit të Deçanit u bë kusht për anëtarësim të Kosovës në Këshill të Evropës, për shkak të mosrespektimit të vendimeve të Gjykatës Kushtetuese nga kjo qeveri.
Cana thekson se Manastiri nuk ka qenë asnjëherë kusht për anëtarësimin e Kosovës në KiE.
“Kjo qeveri karakterizohet për mosrespektim, më së shumti në histori të Kosovës, të vendimeve të Gjykatës Kushtetuese dhe kritikave të drejtuara ndaj Gjykatës Kushtetuese. Si rezultat i kësaj, kushti për Manastirin e Deçanit është puro i lidhur me mosrespektimin e vendimeve të kësaj gjykate. Asnjëherë manastiri nuk ka qenë kusht për KiE”, është shprehur ai në emisionin “Ditari” në TËVË 1.
Sipas Canës, anëtarësimi i Kosovës në KiE, bazuar në dinamikat aktuale, mund të ketë pak vështirësi.
Ai thotë që edhe pse Kosova ishte e gatshme për anëtarësim në këtë këshill, diçka e tillë nuk ndodhi për shkak të rrethanave gjeopolitike dhe interesave të ndryshme.
“Në bazë të gjitha dinamikave do të ketë pak vështirësi, por do ta shohim, koha do ta tregojë. Megjithatë Kosova ishte e gatshme që të bëhet anëtare para 10 viteve, por për shkak të rrethanave gjeopolitike nuk kishte mundësi të ndodhte dhe disa interesave të ndryshme”, shtoi ai.
Ndryshe, sot opinioni i raportueses Bakoyannis në Komitetin për Çështje Politike dhe Demokraci të Këshillit të Evropës i cili rekomandon anëtarësimin e Kosovës në Këshillin e Evropës pa asnjë parakusht shtesë është miratuar në Komitetin e Asamblesë Parlamentare të KiE
