Stadiumi i rinovuar “Camp Nou” i Barcelonës është favorit i UEFA-s për organizimin e finales së Ligës së Kampionëve në vitin 2029, e cila planifikohet të zhvillohet më 2 qershor.
Sipas “Mundo Deportivo”, kandidatura katalunase aktualisht vlerësohet më e fortë se ajo e stadiumit “Wembley” në Londër. Ajo mbështetet nga Komuna e Barcelonës, Qeveria e Katalonjës, Federata Spanjolle e Futbollit dhe Qeveria e Spanjës.
Një nga avantazhet kryesore të “Camp Nou” është kapaciteti i parashikuar prej 104 mijë e 600 spektatorësh, çka do ta bënte atë stadiumin më të madh në Evropë. Pas përfundimit të rinovimit, stadiumi pritet të ketë edhe rreth 9 mijë e 400 ulëse VIP.
Punimet që po vazhdojnë nuk konsiderohen pengesë për kandidaturën, pasi zyrtarët e UEFA-s po e përcjellin nga afër zhvillimin e projektit.
Vendimi përfundimtar pritet të merret më 15 shtator, gjatë mbledhjes së Komitetit Ekzekutiv të UEFA-s në Selanik të Greqisë.
