Ish-inspektori i përgjithshëm i Agjencisë Kosovare të Inteligjencës, Burim Ramadani, i është bashkuar Aleancës për Ardhmërinë e Kosovës.
Lajmi është bërë i ditur sot nga kryetari i AAK-së, Ramush Haradinaj, përmes një njoftimi në Facebook.
Haradinaj e ka vlerësuar Ramadanin si profesionist të shquar të sigurisë dhe si njeri me integritet të lartë.
“Burim Ramadani është mendje e kthjellët që punon për sigurinë e shtetit. Është ndër njerëzit më të përgjegjshëm dhe profesionistët më të përgatitur që unë njoh. Besnikëria ndaj shtetit, integriteti i tij, përvoja dhe aftësitë e bëjnë një vlerë të veçantë për Kosovën”, ka shkruar Haradinaj.
Ai gjithashtu ka bërë të ditur se Ramadani do të kandidojë për deputet nga radhët e AAK-së, duke thënë se beson se qasja e tij “racionale, kritike dhe e matur” do t’i shërbejë vendit.
“E mbështes plotësisht kandidimin e tij për deputet, sepse besoj që zëri dhe veprimi i tij racional, kritik dhe i matur do t’i shërbejë shtetit. Kosova ka nevojë për të. Ne kemi nevojë për të. Jam i lumtur që pranoi kërkesën tonë që të kandidojë për deputet dhe shpresoj se do të jemi bashkë në Parlament”, ka përfunduar Haradinaj.
Ndryshe, Ramadani ka mbajtur disa poste shtetërore më herët sa ishte pjesë e AAK-së.
Ai ka qenë zëvendësministër i Mbrotjes më 2018-2019 dhe Koordinator Nacional për Integrim dhe Anëtarësim në NATO në vitin 2019.
