Brukseli ka shtuar vëmendjen ndaj mënyrës se si po trajtohen shqiptarët në Serbi.
Brenda një periudhë të shkurtër kohore, deputeti i vetëm shqiptar në Kuvendin e Serbisë, Shaip Kamberi ka pranuar dy letra të rëndësishme nga zyrtarë të lartë evropian.
Komisionerja e Bashkimit Evropian për Zgjerim, Marta Kos, ne letrën e dërguar ka bërë të ditur mes tjerash se Serbia është e detyruar t’i respektojë të drejtat e shqiptarëve sipas standardeve ndërkombëtare nëse aspiron që një ditë të bëhet pjesë e familjes së madhe evropiane.
Në letër po ashtu përmendet çështja e pasivizimit të adresave të shqiptarëve në Preshevë, ku BE-ja ka kërkuar nga autoritetet serbe të dalin me shpjegime.
“Dëshiroj t’ju siguroj se Komisioni po ndjek nga afër trajtimin e personave që i përkasin pakicave kombëtare, përfshirë situatën e komunitetit shqiptar në Serbi, gjithashtu në kontekstin e zotimeve të marra nga Serbia në kuadër të negociatave për anëtarësim në BE. Në kuadër të Kapitullit 23 “Gjyqësori dhe të Drejtat Themelore” të negociatave për anëtarësim, Serbia është e detyruar të zbatojë kuadrin e saj ligjor për të drejtat e personave që u përkasin pakicave në përputhje me standardet ndërkombëtare dhe evropiane”, ka thënë Kos.
Ndërkaq njohësi i rrethanave politike në Luginën e Preshevës, Valon Arifi, liston edhe disa probleme të tjera më të cilat ballafaqohen shqiptarët në Serbi.
“Shqiptarët në Serbi diskriminohen edhe në përfaqësimin e tyre administrativ meqë nuk integrohen në institucionet republikane të Serbisë. Pra është e qartë se mungon përfaqësimi shqiptar në institucionet serbe. Diskriminim tjetër është mos njohja e simboleve kombëtare”, ka thënë Arifi.
Tutje, Arifi i ka vlerësuar iniciativat e deputetit Kamberi, megjithëse thotë se janë të vonuara.
“Aktivitetet e z. Kamberi janë të nevojshme, por të vonuara. Politika të tilla duhej të ishin ndërmarrë shumë më herët në Luginën e Preshevës. Një problem tjetër është se z. Kamberi ka njoftuar se nuk do të kandidojë për deputet, ndonëse zgjedhjet e reja në Serbi mund të mbahen së shpejti”, ka thënë Arifi.
Deputeti shqiptar, Shaip Kamberi, ka njoftuar se ka dorëzuar një rezolutë në parlamentin e Serbisë për pozitën e shqiptarëve në luginë të Preshevës, ku ka kërkuar që te drejtat e tyre të respektohen sipas standardeve ndërkombëtare.
