Kjo fotografi është e preferuara e Ferdonije Qerkezit.
Në këtë shtëpi forcat serbe hynë me dhunë dhe i morën burrin e katër djemtë nënës nga Gjakova.
Trupat e 2 djemve, Artanit dhe Edmondit janë gjetur në lokacione të ndryshme në vitin 2005 në Kosovë.
Mirëpo më shumë se dy dekada Qerkezi po pret lajmin për trupat e dy djemve tjerë dhe bashkëshortit, që figurojnë ende të zhdukur.
Krahas këtyre, edhe fati i 1617 personave të zhdukur dhunshëm nga regjimi serb ende nuk është zbardhur.
Si përkrahje për familjet e të zhdukurve, Zyra e Kryeministrit ka blerë një sasi arkivolesh dhe ka ndarë para për ceromonitë mortore, për një periudhë 36 mujore.
Kontrata në vlerë rreth 65 mijë eurosh e dhënë nga kjo zyre, vjen si rrjedhojë kërkesë e Komisionit Qeveritar për Persona të Zhdukur.
“Kontrata kornizë mbulon një periudhë kohore trevjeçare dhe përfshinë rreth 200 arkivole dhe shërbime tjera përcjellëse me rastin e organizimit të rivarrimeve, si; hapjen dhe mbylljen e varreve, përfshirë edhe rastet specifike me murosje në komplekset memoriale, apo edhe shërbimet logjistike me qëllim nderimi siç janë lulet dhe flamujt, si dhe shërbimet e pastrimit të rrobave dhe artefakteve të personave të zhvarrosur dhe të identifikuar”, thuhet nga Komisioni Qeveritar për Persona të Zhdukur.
Varësisht kërkesave dhe nevojave të paraqitura nga familjet e të zhdukurve, parashihet zbatimi i kësaj kontrate dhe plotësimi i saj.
“Në asnjë rrethanë sasia në fjalë nuk duhet të ndërlidhet me pritshmërinë apo planifikimet e Komisionit Qeveritar për Persona të Zhdukur dhe institucioneve tjera kompetente, meqë siç e kemi theksuar edhe më parë Serbia vazhdon ta mbajë të politizuar çështjen e personave të zhdukur”, është thënë nga Komisioni për Qeveritar për Persona të Zhdukur.
Tenderi për furnizim me arkivole dhe shërbime të ndërlidhura me rastet e rivarrimit të personave të zhdukur qëndroi i hapur për një muaj, kurse kontrata u nënshkrua më 1 prill, me çmimin më të ulët dhe në procedurë të hapur.
Kronika e realizuar nga gazetarja Florijeta Dernjani.
