Mesfushori i Kombëtares së Shqipërisë, Medon Berisha pritet të rikthehet këtë vikend në fushë për skuadrën e Lecces.
Berisha tashmë është rikuperuar nga lëndimi, ndërsa të mërkurën ka kryer stërvitje individuale përpara se të jetë gati të bashkohet me pjesën tjetër të grupit.
Tek Lecce po shpresojnë që Berisha të jetë gati për duelin kundër Parmës, të cilin Lecce e luan të dielën në shtëpi në kuadër të kampionatit italian.
Berisha shkaku i lëndimit i ka munguar Lecces në tri ndeshjet e fundit në Serie A, ku ka regjistruar dy humbje dhe një barazim, ndërsa vlerësohet si njëri prej lojtarëve kyç për ekipin e trajnerit Eusebio Di Francesco.
22-vjeçari në 13 ndeshje kampionale këtë sezon, ka shënuar 2 gola dhe ka bërë 3 asistime kurse tek Lecce është bashkëlojtar me mesfushorin tjetër të Shqipërisë, Ylber Ramadanin.
