Presidenti i Shqipërisë, Bajram Begaj, ka shprehur shqetësim për përshkallëzimin e tensioneve gjatë protestave në vend, duke u bërë thirrje të gjitha palëve që të veprojnë me përgjegjësi dhe vetëpërmbajtje. Ai ka theksuar se protesta paqësore është një e drejtë themelore në demokraci, ndërsa ka paralajmëruar se as dhuna dhe as përdorimi joproporcional i forcës nga policia nuk mund të justifikohen.
Përmes një postimi në rrjetin social Facebook, Begaj ka theksuar se e drejta për protestë paqësore është një nga shtyllat e demokracisë dhe se shteti ka për detyrim ta garantojë atë.
Megjithatë, sipas tij, shprehja e pakënaqësisë nuk duhet të shoqërohet me dhunë, ndërsa edhe veprimet e policisë duhet të mbeten brenda kufijve të përcaktuar me ligj.
“Presidenti i Republikës ndjek me shqetësim përshkallëzimin e tensioneve gjatë protestave dhe u bën thirrje të gjitha palëve të veprojnë me përgjegjësi e vetëpërmbajtje. E drejta për protestë paqësore është themel i demokracisë dhe detyrim i shtetit për ta garantuar”, ka shkruar Begaj.
Kreu i shtetit shqiptar ka theksuar se ruajtja e qetësisë dhe respektimi i ligjit janë thelbësore në situata të tilla, duke nënvizuar se asnjë palë nuk duhet të veprojë jashtë kornizës ligjore.
“Por dhuna nuk mund të jetë mjet i shprehjes së pakënaqësisë, as përdorimi i forcës nga policia nuk duhet të dalë jashtë kufijve të ligjit dhe proporcionalitetit. Në këtë moment, vendit i duhet më shumë përgjegjësi. Kushtetuta dhe ligji duhet të mbeten kufiri i të gjithëve, pa përjashtim”, thuhet në reagimin e tij.
Begaj ka bërë të ditur gjithashtu se është i gatshëm të dëgjojë shqetësimet e qytetarëve dhe ka theksuar rëndësinë e dialogut si mënyrë për të adresuar pakënaqësitë dhe për të kontribuar në të mirën e vendit.
“Mbetem i gatshëm të dëgjoj të gjitha shqetësimet. Zyra ime është dhe do të mbetet e hapur për çdo të ri e çdo qytetar që dëshiron të shprehet, të dialogojë dhe të kontribuojë për të mirën e vendit”, ka përfunduar Begaj në postimin e tij.
Reagimi i presidentit shqiptar vjen në një kohë tensionesh gjatë protestave, ndërsa ai u ka bërë thirrje palëve që të tregojnë përgjegjësi dhe të respektojnë Kushtetutën dhe ligjin.
