Pronari i Steaua Bukureshtit, Gigi Becali ka folur pas fitores së ekipit të tij ndaj Dritës në ndeshjen e parë të raundit të tretë kualifikues të Ligës së Evropës.
Steaua triumfoi 3:2 ndaj Dritës dhe atë me përmbysje të rezultatit, falë golit të shënuar nga penalltia në minutën e katërt të kohës shtesë.
“Më pëlqeu karakteri i ekipit, pasi është skuadër me të cilën po filloj të kem sukses. Thashë se edhe 2:2 ishte rezultat i mirë për ne, por nuk u dorëzuam dhe fituam në fund”, është shprehur Becali.
Pas fitores në Bukuresht, Becali është më se i bindur që Steaua do të avancojë tutje duke u kualifikuar në “play-off” të Ligës së Evropës.
Po ashtu, Becali ka thënë se gaboi që kishte deklaruar për Dritën se është ekip i dobët. Sipas tij, kampionia e Kosovës nuk është i dobët, por është më i fortë se Shëkndija, skuadër që eliminoi rumunët në raundin e dytë kualifikues të Ligës së Kampionëve.
“Normalisht që do të kalojmë tutje, duke marrë parasysh ekipin dhe rezultatin, njëqind për qind. E shihni? Thashë ‘normalisht’. Më parë mburresha, por tani, pas asaj që ndodhi me Shkendijën, nuk do ta them më kurrë. Shkendija ishte vërtet e dobët. Drita nuk është aq e dobët”, shtoi Becali.
