Për 27 vjet, kjo urë simbolizoi ndarjen e një qyteti.
Këtu gjatë gjithë kohës qëndruan karabinierët italianë, në kuadër të misionit të KFOR-it.
E së fundi, KFOR-i vlerësoi se janë plotësuar kushtet e sigurisë që ky pozicion gradualisht t’i kalohet Policisë së Kosovës.
Por, duket se as këta nuk do të qendrojnë gjatë mbi këtë urë.
Kjo meqë nga Bashkimi Evropian, u tha se janë plotësuar kushtet që Ura kryesore e Ibrit të hapet.
E kjo deklaratë e BE-së u mirëprit në Kosovë, ani pse njohesit e sigurisë thonë se institucionet kosovare ka kohë që janë të gatshtshme për këtë.
“Institucionet kosovare kanë qenë të gatshmë qe një kohë të gjatë, mendoj se kjo ndamje fizike është bo për shkak të reagimeve politike të Beogradit, që shpeshherë KFOR-i për të mos nxitë ndonjë reagim më të madh apo për të parandaluar nxitje nga ana e Beogradit të strukturave paralele, ka qëndru në mes dhe në një farë forme e ka rrit këtë ekon që ndarja e lumit Ibër të simbolizojë ndarjen e qytetit” , shprehet Mentor Vrajolli nga Qendra Kosovare për Studime të Sigurisë.
Një sinjalizim i tillë, po ashtu po përkthehet si vlerësim për nivelin e profesionalizimit të autoriteteve kosovare.
“Marrja e përgjegjësisë së sigurisë në atë pjesë, tregon se gjendja e sigurisë është në nivel të duhur dhe institucionet e sigurisë së Republikës së Kosovës, janë të ngritura në nivelin e tillë që nuk është më sfiduese asnjë ngjarje e sigurisë e asnjë veprim çfarëdo grupi”, thotë Valdet Hoxha, ish-zëvendësministër i Punëve të Brendshme.
Pavarësisht të gjithave, po kërkohet kujdes nga grupet serbe, pasi këto të fundit mund të provojnë destabilizimin e situatës.
“Ajo çka duhet të sigurojmë është që eksponentë nga jashtë të mos hyjnë në Kosovë dhe të synojnë që të krijojnë një imazh të rremë se komuniteti serb është i pakënaqur dhe që qytetarët po ndërmarrin aksione për të ndjekur politikisht këdo. Është me rëndësi që ky grupi i Banjskës të mos futet në Kosovë pa u legjitimu dhe arrestu, për faktin se ata posedojnë risk potencial për destabilizim të situatës”, shprehet Vrajolli.
Për hapjen e Urës së Ibrit, ka reaguar edhe ish presidentja Vjosa Osmani.
Kjo e fundit përmes një statusi në Facebook, tha se ky është një hap historik drejt luftimit të tendencave të Serbisë për gllabërim territoresh.
Lidhur me deklaratat e Bashkimit Evropian për hapjen e Urës së Ibrit, televizioni ka tentuar të marrë një qëndrim edhe nga ekzekutivi kosovar, por nuk ka marrë përgjigje gjatë ditës.
Ndërsa hapjen e Urës më të përfolur që nga paslufta, e paralajmeroi për Tëvë1 një javë më parë gjatë vizitës këtu, edhe ministri në detyrë i Punëve të Brendshme Xhelal Sveçla.
