Presidentja e Komisionit Evropian, Ursula von der Leyen, reagoi ndaj deklaratave të fundit të presidentit amerikan,Donald Trump lidhur me rritjen e tarifave për automjetet e importuara nga Bashkimi Evropian.
Trump njoftoi vonë të premten se Shtetet e Bashkuara planifikojnë të rrisin tarifat për makinat dhe kamionët e importuar nga BE-ja nga 15% në 25%, duke filluar nga java e ardhshme.
Ky njoftim erdhi gjatë një feste zyrtare në pjesën më të madhe të Evropës, duke shkaktuar reagime të menjëhershme në Bruksel, raporton Guardian.
Duke folur nga Jerevani, ku po mbahet samiti BE-Armeni, von der Leyen theksoi rëndësinë e respektimit të marrëveshjeve ekzistuese midis palëve.
Ajo theksoi se, nga ana e Bashkimit Evropian, procesi i zbatimit të angazhimeve tarifore është në fazat përfundimtare, ndërsa pritet që edhe pala amerikane të përmbushë detyrimet e saj, përfshirë rastet ku përputhja me kufijtë e dakorduar mbetet ende në pritje.
“Nga ana e Bashkimit Evropian, tani jemi në fazat e fundit të zbatimit të angazhimeve të mbetura tarifore. Në të njëjtën kohë, SHBA-të kanë angazhimin, për shembull, aty ku përputhja me kufirin e rënë dakord është ende në pritje”, tha ajo.
Von der Leyen përfundoi duke theksuar se BE-ja synon përfitim të ndërsjellë, bashkëpunim dhe besueshmëri në marrëdhëniet transatlantike, duke shtuar se blloku evropian mbetet “i përgatitur për çdo skenar”.
