Sot në mbrëmje, mbyllet faza çerekfinale e Ligës së Kampionëve, ku do të përcaktohen edhe dy skuadrat e fundit që avancojnë në gjysmëfinale.
Megjithatë, vëmendja do të jetë në Munchen, ku në stadiumin “Allianz Arena” me fillim në orën 21:00, do të përballen Bayerni me Real Madridin.
Ndeshja e parë, e luajtur javën e shkuar në Madrid, ka përfunduar me fitoren 2:1 të Bayernit dhe Reali kërkon përmbysjen e madhe në duelin e kthimit për të prekur gjysmëfinalen.
Megjithatë, misioni i madrilenëve do të jetë i vështirë për faktin se Bayerni nuk e ka në favor vetëm rezultatin dhe përparësinë e terrenit, por edhe synon ta eliminojë Realin për ta lënë pa trofe këtë sezon.
Championsi është gara e vetme që i jep mundësinë Realit për të fituar trofe, pasi në La Liga është prapa Barcelonës, që mbetet favorite për titullin e kampionit.
Dueli në Munchen pritet të jetë i fortë, me të dyja skuadrat që kërkojnë fitoren në këtë përballje që vlerësohet “finale para finales”.
Përderisa Bayerni është i kompletuar për këtë ndeshje, Reali do të jetë pa të lënduarit Thibaut Courtois e Rodrygo, si dhe të suspenduarin Aurelien Tchouameni.
Skuadra që avancon tutje, në fazën gjysmëfinale të Championsit do të përballet me Paris Saint-Germainin, që në çerekfinale eliminoi skuadrën e Liverpoolit.
