Bayerni i ka mbijetuar një fundi të furishëm të PSG-së për fitore të madhe në “Parkun e Princave”. Kampioni gjerman fitoi 1:0 të martën mbrëma ndaj PSG-së në ndeshjen e parë të një të tetës së finales të Ligës së Kampionëve.
Bayerni ndeshjen e dytë e luan në shtëpi dhe është në pozitë të mirë për t’u kualifikuar në çerekfinale. Sfida është vendosur në minutën e 53-të, kur Kingsley Coman shënoi me një goditje të saktë nga zona.
Vetëm më pas kampioni i Francës, PSG-ja, është hedhur në sulm. Një gol i Kylian Mbappes është anuluar për pozitë jashtë loje, ndërsa kanë provuar edhe Lionel Messi dhe Neymari.
Mbappe është kthyer papritur nga një lëndim dhe është aktivizuar si zëvendësues. Si zakonisht ka bërë dallimin, por pa konkretizim. Benjamin Pavard i Bayernit është përjashtuar pas kartonit të dytë të verdhë, në minutën e 92-të.
Ndërkohë, në ndeshjen tjetër, Milan mori një fitore tejet të rëndësishme ndaj Tottenham në shtëpi me rezultatin 1-0. Kuqezinjtë ia dolën falë një goli në minutën e shtatë të pjesës së parë nga ana e Brahim Diaz.
Një gol që në fakt mbeti i vlefshëm për të gjithë pjesën e mbetur të sfidës përtej përpjekjeve të anglezëve për të barazuar apo vendasve për të dyfishuar. Gjithsesi, në sfidën e ardhshme që do të luhet më datë tetë mars në Londër, të besuarit e trajnerit Stefano Pioli nisen të avantazhuar.
