Prokuroria Themelore në Prishtinë, përkatësisht Departamenti për Krime të Rënda, ka njoftuar se në koordinim me Inspektoratin Policor të Kosovës (IPK) dhe Drejtorinë për Hetimin e Krimeve Ekonomike dhe Korrupsionit, janë duke u zhvilluar dy aksione të ndara në disa lokacione në Prishtinë, Fushë Kosovë dhe Obiliq.
Sipas njoftimit, aksionet po realizohen në bazë të urdhëresës së Gjykatës Themelore në Prishtinë për bastisjen e pesë zyrtarëve dhe dy qytetarëve, të dyshuar për përfshirje në veprimtari kriminale që lidhen me disa vepra penale.
Ndaj të dyshuarve rëndojnë akuzat për “keqpërdorim të pozitës apo autoritetit zyrtar”, “shkelje të fshehtësisë së procedurës”, “marrje deklaratash me anë të shtrëngimit”, “keqpërdorim të informatës zyrtare”, “mashtrim”, “legalizim të përmbajtjes së rreme”, si dhe “marrje dhe dhënie ryshfeti”, sipas dispozitave përkatëse të Kodit Penal të Republikës së Kosovës.
Sipas hetimeve fillestare, të dyshuarit dyshohet se kanë vepruar në bashkëveprim për përfitime të kundërligjshme pasurore, përmes falsifikimit të dokumenteve pronësore dhe ndryshimit të paligjshëm të pronarëve të tyre.
Po ashtu, pesë zyrtarë publikë dyshohen se kanë tejkaluar kompetencat e tyre ligjore, duke mundësuar përfitime të kundërligjshme për palë të treta.
Prokuroria Themelore në Prishtinë ka theksuar se mbetet e përkushtuar në luftimin e korrupsionit dhe kriminalitetit dhe do të vazhdojë me veprimet hetimore në përputhje me ligjin.
