Me derbin tjetër, atë ndërmjet Sigal Prishtinës dhe Bashkimit do të mbyllet xhiroja e 25-të në Superligën e Kosovës në basketboll.
Kjo përballje do të luhet sot, me fillim nga ora 19:30 në Pallatin e Rinisë dhe Sporteve në Prishtinë.
Të dyja skuadrat kërkojnë fitoren në këtë ndeshje, e cila vlerësohet shumë e rëndësishme si për Prishtinën ashtu edhe Bashkimin.
Përderisa Sigal Prishtina kërkon triumfin për t’i ikur fundit të tabelës, Bashkimi synon fitoren për të mbajtur pozitën aktuale kur kanë mbetur edhe dy xhiro deri në fund të sezonit të rregullt.
Aktualisht, Bashkimi është i dyti në tabelë me 40 pikë, shtatë më shumë se Sigal Prishtina që renditet e parafundit.
Gjithashtu, të dyja skuadrat në këtë derbi futen pas humbjeve që i pësuan xhiron e shkuar, ku Bashkimi u mposht në shtëpi nga Trepçës derisa Sigal Prishtina pësoi nga Rahoveci 029.
Në tri ndeshjet e luajtura të kësaj xhiroje, të shtunën dhe të dielën, janë arritur këto rezultate: Bora – Vëllaznimi 86:82, Rahoveci 029 – Peja 81:89 dhe Golden Eagle Ylli – Trepça 80:91.
