Basketbollistet e Bashkimit do ta nisin mbrojtjen e titullit kundër skuadrës së Prishtinës, ka njoftuar Federata e Basketbollit të Kosovës.
Të enjten, është tërhequr shorti për sezonin 2024/25 në Superligën e femrave, që starton muajin tjetër, saktësisht më 11 tetor.
Qysh në xhiron e parë, do të kemi derbi pasi Bashkimi dhe Prishtina, janë rivalët më të mëdhenj vitet e fundit në basketbollin e femrave.
Bashkimi në dy sezonet e fundit, ka dominuar plotësisht duke e fituar “tripletën”, përfshirë titullin, kupën dhe Superkupën. Ndërkohë, Prishtina sezonin e fundit, triumfoi në Ligën Unike.
Edhe këtë sezon, Superliga e femrave do t’i ketë gjashtë skuadra dhe pritet të ketë rivalitet në parket.
Çiftet tjera të xhiros së parë, janë Peja 03 – Trepça dhe Junior 06 – Penza. Skuadra Junior 06, debuton në Superligën e femrave këtë edicion.
Sipas FBK-së, ky sezon pritet të jetë njëri prej më interesantëve në vitet e fundit. Të gjitha, skuadrat pothuajse janë forcuar me lojtare të huaja kurse para Superligës do të luhet turneu i Superkupës së Kosovës.
